Alexander episcopus, servus servorum Dei, dilectis filiis archidiaconis ecclesie Aurelianensis salutem et apostolicam benedictionem. Cum a nobis petitur quod justum est et honestum, tam vigor equitatis quam ordo exigit rationis ut id per solicitudinem officii nostri ad debitum perducatur effectum. Sane petitio vestra nobis exhibita continebat quod venerabilis frater noster episcopus Aurelianensis, tenuitatem reddituum archidiaconatuum vestrorum attendens, proinde ut facilius et liberius possitis officii vestri debitum exercere, quasdam parrochiales ecclesias in quibus, ratione predictorum archidiaconatuum, jus patronatus habetis Aurelianensis diocesis, ad ipsius collationem spectantes, Aurelianensis capituli ad id accedente consensu, eisdem archidiaconatibus concessit, prout in literis inde confectis plenius dicitur contineri. Nos itaque, vestris supplicationibus inclinati, quod super hoc ab eodem episcopo proinde factum est ratum et firmum habentes, id auctoritate apostolica confirmamus et presentis scripti patrocinio communimus. Nulli ergo etc... Si quis autem, etc... Datum Viterbii sexto idus aprilis, pontificatus nostri anno quarto.