Universis presentes litteras inspecturis officialis curie Aurelianensis salutem in Domino. Noveritis quod in presentia Gaufridi Chathelene, curie nostre notarii jurati ad hoc a nobis specialiter destinati, et cui super hoc et in majoribus fidem adhibemus, constituti Johanes Morini, miles, et domina Gila, ejus uxor, quamdam censivam moventem ex feudo dicti militis, quam vir venerabilis Raymondus de Loduno, capicerius Aurelianensis, habet Aurelianis et apud Magdunum et apud Dornesiacum et apud Semeyum, quam quidem censsivam dictus Raymondus emerat nomine suo, non nomine ecclesie Sancte Crucis, et quam censivam tenet in feodo a dicto milite, coram dicto notario amortificaverunt, et quicquid juris habebant et habere poterant in predicta censsiva jure aliquo seu causa racione feudi, dicto Raymondo quitaverunt et penitus imperpetuum dimiserunt, volentes et concedentes quod dictus Raymondus dictam censsivam tenere valeat amortificatam vel ab ipso causam tenendi habentes et etiam possedendi, et eamdem censsivam vendere, alienare, donare et elemosinare cuicumque voluerit amortificatam, et eam in manu mortua tenere, pro qua amortificacione confessi fuerunt coram dicto notario se habuisse et recepisse in pecunia numerata a dicto Raymondo viginti libras parisiensium, et renunciaverunt excepcioni non numerate pecunie, sibi non tradite non solute, et promiserunt dicti miles et ejus uxor se curaturos et facturos, infra Rexurectionem Dominicam, quod Galterus de Annemosio, secundus dominus feodalis dicte censive, ratam habebit amortificacionem predictam et eam concedet eidem Raymondo et ejus causam habentibus tenendi eamdem, et quicquid juris habet et habere potest vel debet racione feudi in dicta censsiva dicto Raymondo vel ab eo causam habentibus possidenda quitabit penitus et dimittet, et litteras sufficientes super hoc concedet Raymondo superius nominato. Et omnia et singula supradicta promiserunt, etc... Hanc autem amortificacionem et dimissionem predictam predicte censsive et ejusdem parcium Huotus, filius dictorum militis et ejus uxoris, coram dicto notario constitutus, de voluntate et auctoritate patris sui presentis voluit, concessit, laudavit, ratificavit et eciam approbavit, et quicquid juris habet et habere debet in futurum dicto Raymondo quitavit penitus et dimisit, et supposuerunt se omnes et singuli quantum ad hec jurisdicioni curie nostre. In cujus rei memoriam et testimonium presentibus litteris ad relacionem dicti notarii sigillum Aurelianensis curie duximus apponendum una cum sigillo militis supradicti. Datum anno Domini millesimo ducentesimo septuagesimo sexto, die jovis post Brandos.

Gaufridus.