Universis presentes litteras inspecturis Johannes de Aurelianis, miles, salutem in Domino. Notum facimus quod nos totam decimam de Villemain, in parrochia de Charconvilla sitam, quam tenebat a nobis in feudo Raginaldus de Sours, miles, quam quidem decimam dictus Raginaldus vendidit viris venerabilibus et discretis decano et capitulo Aurelianensibus, dictis decano et capitulo tanquam primus dominus feudalis dicte decime admortificamus, et volumus et concedimus quod dicti decanus et capitulum dictam decimam admortificatam exnunc in perpetuum in manu mortua teneant et possideant, et promittimus bona fide quod nos tanquam primus dominus feudalis dictam decimam liberabimus, guarantiabimus et deffendemus dictis decanis et capitulo perpetuo contra omnes qui se dicerent seu facerent dominos feudales decime supradicte, excepto domino episcopo Aurelianensi, a quo tenuimus in feudum decimam supradictam. Et quantum ad omnia et singula supradicta tenenda et adimplenda obligamus nos et heredes et successores nostros et omnia bona nostra mobilia et immobilia, presentia et futura, decano et capitulo supradictis. In cujus rei memoriam et testimonium presentes litteras dictis decano et capitulo ad preces dicti Raginaldi dedimus, sigillo nostro sigillatas. Datum anno Domini millesimo CCLXX septimo, die jovis post festum Sancti Martini estivalis.