In nomine Domini, amen. Anno ejusdem millesimo ducentesimo nonagesimo octavo, duodecima die mensis januarii, indictione duodecima pontificatus domini Bonifacii pape octavi anno qninto, per hoc presens instrumentum publicum pateat universis quod, congregatis in capitulo ecclesie Aurelianensis hora capituli ad pulsacionem campane, ut moris est, venerabilibus viris et discretis dominis Thoma subdecano, Petro Aurelianensi archidiacono, Andrea capicerio, Helya scolastico, Odone archipresbitero et Guimondo capellano in eadem ecclesia, Guillelmo de Pertico, Milone de Chailliaco1, Egidio de Dumo Gaillardi, Guillelmo de Voys, Guillelmo de Billiaco, Philippo de Mornayo et Guidone de Chaillenoy ac Johanne Colli Rubei, canonicis ecclesie predicte, presente inibi reverendo in Christo patre ac domino domino F[errico], Dei gratia Aurelianensi episcopo, in presentia mei publici notarii et testium subscriptorum, cum venerabiles viri domini Aurelianensis, Sigalonensis et Soliacensis archidiaconi in ecclesia Aurelianensi predicta, ex pluribus causis et gravaminibus, contra eundem reverendum patrem, ejus vicarios et officialem ac procuratores et consiliarios appellassent, ut in appellatione ipsorum archidiaconorum super hiis confecta plenius continetur, ac venerabiles viri capitulum ejusdem ecclesie Aurelianensis, in quantum eos tangebat, appellationi adhesissent eidem, prout in appellatione continetur predicta, et prefatum capitulum, coram ipso reverendo patre, conquererentur quoad presens et de ipso episcopo, pro quod idem reverendus pater vel gentes ipsius Egidium, rectorem de Baigniaco, Aurelianensis diocesis presbiterum, et Philippum dictum de Audientia, clericum, existentes de choro et jurisdictione capituli predicti et in quos presbiterum et clericum habebant eidem capitulum, ut dicebant, omnimodam jurisdictionem, ceperant seu capi fecerant et carceri mancipari, in prejudicium ipsius capituli ut dicitur et jurisdicionis ipsorum, videlicet dictum rectorem ecclesie de Baigniaco pro eo quod imponebatur eidem rectori eundem furtive supripuisse quosdam cereos et libros de ecclesia sua de Bagniaco predicta, et dictum Philippum de Audientia pro eo quod quasdam litteras exequtorias sigillo Aurelianensis curie sigillatas rupisse dicebatur. Tandem pro bono pacis idem dominus episcopus voluit et concessit ac promisit bona fide super expedicione et liberacione ipsorum presbiteri et clerici stare ordinacioni venerabilium virorum dominorum subdecani et capicerii predictorum, et tenere ac observare quicquid ipsi domini subdecanus et capicerius super hujusmodi casibus duobus ducerent ordinandum, prout idem reverendus pater confessus fuit et asseruit coram me publico notario et testibus infrascriptis. Confessione hujusmodi facta et recitata, dictus subdecanus, vice ac nomine ipsius capicerii et sua, omnem ordinationem hujusmodi in se suscepto pronunciavit per ordinationem suam predictam dictos rectorem et Philippum de Audientia de jurisdicione ipsius capituli existere et per gentes ejusdem domini episcopi injuste captos fuisse ac per eas indebite fuisse detentos et in prejudicium ipsius capituli ac jurisdicionis ejusdem, eosdemque rectorem et clericum restituendos esse justiciandos per capitulum antedictum, necnon et quosdam fidejussores, datos a dicto Philippo gentibus ipsius domini episcopi occasione delicti eidem Philippo, impositi penitus deliberari debere ac liberatos esse per ordinacionem predictam, quibus ordinacioni et pronunciacioni expresse consensit idem dominus episcopus, et ratificavit, et comprobavit easdem. Item cum gentes ipsius domini episcopi cepissent, ut dicebatur, quendam clericum in appenditiis seu stationariis Domus Dei Aurelianensis, versus portam Parisiensem, qui deliquisse dicebatur in dicto loco in quo dictum capitulum omnimodam justitiam temporalem habere dicitur, item et quendam laicum per gentes prefati domini episcopi, ut asserebatur, captum in vico de Burgo Novo, ubi sepedictum capitulum similiter omnimodam fertur jurisdicionem temporalem habere, prefatus dictus episcopus, hos duos casus minime ratificans, eos penitus revocavit, ac precepit dictos clericum et laicum restitui capitulo supradicto. Hiis vero sic actis memoratum capitulum ab adhesione quam dicte appellationi dictorum archidiaconorum fecerat destitit penitus et cessavit. Actum in dicto capitulo anno, mense, die, indictione et pontificatu predictis, presentibus inibi discretis viris magistris Benedicto, capicerio sancti Petri Virorum Aurelianensis, et domino Guillelmo Juveni, archipresbitero Pitverensi, et Philippo de Roncia, clerico, testibus ad hoc vocatis et rogatis cum domino episcopo et capitulo supradictis.

Et ego Guillelmus de Boscocommuni, Senonensis diocesis, clericus, auctoritate sacrosancte Romane ecclesie publicus et Aurelianensis curie notarius, premissis prefatis vocatus interfui, presensque hoc instrumentum publicum inde confectum propria manu scripsi, et in hanc publicam formam redegi, meoque consueto signo signavi rogatus.