H[enricus], Dei gratia Aurelianensis episcopus, omnibus in perpetuum. Ut in nostris gesta temporibus robur perpetue stabilitatis optineant et memoriam nasciture posteritatis attingant, consilio maturiore provisum est res sollempniter celebratas sigillatis apicibus perhennari. Eapropter ad universitatis vestre noticiam volumus pervenire, quod in nostra presentia constituti Gylo de Loriaco clericus et Johannes miles et Adam et Henricus fratres dicti clerici, multis opinionis honeste personis astantibus, quicquid in ecclesia de Chileriis se habere dicebant karissimis consanguineis nostris Hugoni venerabili sancte Crucis decano et M[anasse] capicerio et post ipsorum decessum ecclesie Sancte Crucis perpetuo absolute et libere quitaverunt, et quod nichil umquam de cetero in eadem ecclesia reclamarent, interposita christiane fidei religione firmarunt. A supradictis igitur G[ylone] et J[ohanne] et A[damo] et H[enrico] tamquam a nostris fidelibus exorati, quitationem illam decano et capicerio et post ipsos ecclesie Sancte Crucis et ab illis et ab eorum heredibus manucapimus firmiter et fideliter observandam et eam ad preces et postulationem ipsorum carte et sigilli presentis auctoritate in perpetuum confirmamus. Actum Aurelianis anno Verbi incarnati MCXCII.