Manasses, Dei gratia Aurelianensis episcopus, omnibus ad quos presentes littere pervenerint salutem in Domino. Universitati vestre notum facimus Ernaudum Porterium et uxorem ipsius nomine Beatricem quicquid decime magne scilicet et minute in parrochia de Donisiaco possident capitulo Sancte Crucis pro triginta libris parisiensium integre titulo pignoris obligasse, ita quod in nostra constitutus uterque presentia super garantienda capitulo decima corporaliter fidem dedit. Gaufridus etiam de Suliniaco miles, de cujus feodo ipsa movet decima, hanc obligationem decime approbavit, promitens firmiter coram nobis quod eandem decimam bona fide capitulo garantiret. Quod ut ratum et notum maneat, sigilli nostri caractere ad petitionem partium fecimus confirmari. Actum anno gratie MCC septimo, mense martio.