Universis presentes litteras inspecturis Johannes de Castellione, comes Blesensis, salutem in Domino. Noveritis quod nos in causa seu in causis quam vel quas habemus inter nos, ex una parte, et venerabiles viros decanum et capitulum Sancte Crucis Aurelianensis coram venerabilibus viris archidiacono Drocensi in ecclesia Carnotensi et decano Magdunensi, Aurelianensis dyocesis, ab utraque parte super dictis causis et contencionibus factis unanimiter arbitris electis, magistrum Johannem Charruau et Andream de Sancto Deodato, clericos nostros, et quemlibet eorum in solidum, ita quod non sit melior condicio occupantis, procuratores nostros constituimus, facimus et ordinamus, dantes eisdem et alteri eorum potestatem et speciale mandatum agendi, detendendi, jurandi in animam nostram de calompnia seu de veritate, ponendi et petitionibus respondendi, et faciendi in dictis causis seu in dictis controversiis coram dictis arbitris nomine nostro quicquid faceremus seu facere possemus si presentes essemus, ratum et gratum habentes et habituri quicquid in dictis causis seu controversiis per dictos procuratores seu per alterum eorum actum fuerit tam pro nobis quam contra nos coram dictis arbitris seu etiam procuratum, promittentes sub ypotheca rerum nostrarum pro dictis procuratoribus seu pro altero eorum si necesse fuerit judicatum solvi. Ratificamus etiam quicquid actum, factum, procuratum fuit coram dictis arbitris pro nobis seu contra nos in predictis causis per dictos procuratores vel per alterum eorumdem seu per alios procuratores nostros, et hoc omnibus quorum interest signamus per presentes litteras sub sigillo nostro sigillatas. Datum anno Domini MCCLX tercio, die lune post dominicam qua cantatur Oculi mei mense martii.