Ego Fulco, decanus Aurelianensis, omnibus presentes litteras inspecturis notum facio quod Johannes de Lauduno, canonicus Sancte Crucis, in mea presentia constitutus, quoddam arpentum terre ad locum situm qui Orgemonz gallice nuncupatur, cujus medietatem prebende sue nomine, medietatem vero reliquam tenebat de confratria Sancte Crucis, Petro de Villari tradidit et concessit quoad eorum uterque vixerit possidendum, eo modo videlicet quod, infra festum Sancti Johannis Baptiste proximum, in toto eodem arpento Petrus cum expensis propriis plantare tenetur vineam, tempore vinearum plantationibus congruenti, usque ad illud festum, et ab ipso festo usque in duorum explectionem annorum culturas omnimodas que plantatis ex novo competunt vineis, eidem vinee de proprio temporibus impensurus debitis, et fructus et proventus ipsius vinee sine participio canonici per primum triennium integre percepturus. Ad plantandam autem eandem vineam et ad eam colendam anno primo quadraginta solidos Petrum juvit canonicus eumdem anno secundo quindecim solidos anno quoque tercio solidos quindecim similiter adjuturus. Hoc tamen conditionis interposito quod, si Petrus ante festum decesserit memoratum, tum de facultatibus suis relinquet liberum quod ad plantandam dictam vineam et ad eam anno primo sufficiet modis omnibus excolendam anno secundo et anno tercio similiter ad omnimodam culturarum illius vinee sufficienciam, si culturis debitis ipsi vinee non impensis decesserit, relicturus. Si vero canonicus decesserit, ipsa vinea libere ad confratriam deveniat prenotatam. Elapsis autem pretaxati triennii curriculis, canonicus ad colendam vineam Petro quinque solidorum auxilium faciet, annuatim in festo Sancti Albini annis singulis solvendorum, omnium fructuum et proventuum ejusdem vinee medietatem integre annorum quolibet habiturus, ita scilicet quod expensas omnes Petrus annis persolvet singulis ad vindemiendam illam vineam donec in cuppam delati racemi fuerint pertinentes, solutione tamen census et decime necnon et calciatarum honere super canonicum remanente. Hoc etiam adjuncto quod circa vineam sepedictam Petrus tenetur plantare frutitem (sic) et ei sufficienter impendere de proprio quicquid pertinet ad clausuram. Has igitur pactiones Petrus se promisit fide prestita corporaliter servaturum et similiter eisdem bona fide firmiter observandis fidejussores interposuit fide interposita singulorum in presenti pagina propriis nominibus designatos, scilicet Robertum Pelliparium, ejusdem Petri avunculum, Johannem de Montrosset, Tilbaldum Paumer, eo tenore videlicet quod si P[etrus] eosdem fideliter non observaverit pactiones, quicquid dampni super hoc provenerit integre ei restituere tenebuntur. Quod in mea factum presentia ut notum et stabile perseveret, sigilli mei testimonio ad petitionem parcium communivi. Actum anno incarnationis dominice MCC tercio decimo, mense novembri.