Robertus, divina miseratione Aurelianensis episcopus,omnibus presentes litteras inspecturis salutem in Domino. Noveritis nos litteras sub sigillo curie nostre Aurelianensis sigillatas vidisse et diligenter inspexisse de verbo ad verbum sub hac forma :

Omnibus presentes litteras inspecturis, officialis curie Aurelianensis salutem in Domino. Noveritis quod Guillelmus Jodoini de Roncheto, de parrochia de Chaverni, armiger, Aales, Agnes, Eremburgis et Corvina, sorores dicti Guillelmi, et Colinus de Melleto, maritus dicte Eremburgis, Johannes Jodoini, Philippus, Stephanus et Amelina, liberi defuncti Johannis de Remorantino, militis, et Petrus Lebugle, maritus dicte Ameline, de parrochia de Villahervei, ut dicebant, et Guillelmus de Ponte, constituti coram viro venerabili magistro Jacobo, canonico Aurelianensi, ad hoc loco nostri specialiter destinato et cui quoad hec fidem adhibemus, viro venerabili magistro Hugoni, ecclesie Aurelianensis archidiacono, ad hoc specialiter destinato nomine venerabilium virorum decani et capituli Aurelianensium, vendiderunt et concesserunt ipsis decano et capitulo imperpetuum pacifice possidenda scilicet dictus Guillelmus Jodoini terciam partem totius quarte partis decimarum vini de parrochia de Fontanis et terciam partem tocius tercie partis decimarum bladi de eadem parrochia de Fontanis, deducto tamen ex ipsa tercia parte ipsius Guillelmi Jodoini dicte tercie partis decimarum bladi uno modio bladi annui redditus ad mensuram de Fontanis, quem ab ipso Guillelmo Jodoini dictus Guillelmus de Ponte emerat, ut dicebat idem Guillelmus Jodoini ; et predicte quatuor sorores ejusdem Guillelmi Jodoini et dictus Colinus de Melleto totam aliam terciam partem dicte quarte partis dictarum decimarum vini et terciam partem dicte tercie partis decimarum bladi ; et predicti omnes liberi dicti defuncti Johannis de Remorantino, militis, et dictus Petrus Lebugle totam residuam terciam partem dicte quarte partis dictarum decimarum vini et totam terciam partem totius dicte tercie partis dictarum decimarum bladi ; et dictus Guillelmus de Ponte dictum modium bladiannui redditus ad dictam mensuram quem, ut dicebat, habebat in dicta parte dictarum decimarum bladi dicti Guillelmi Jodoini, dicto archidiacono similiter ad hoc destinato, nomine dictorum decani et capituli, vendiderunt et concesserunt ipsis decano et capitulo perpetuo pacifice possidenda, salvis tamen in dictis decimis bladi debitis et consuetis hiis reddeventiis tantum, scilicet presbitero de Fontanis quatuor modiis bladi, monialibus de Remorantino duobus sexter[iis] bladi, et priori de Pratea septem sexter[iis] bladi ad dictam mensuram de Fontanis redditus annuatim, precio trecentum et decem octo librarum turonensium, de quibus trecentum et decem octo libris confessi sunt predicti omnes venditores, tam viri quam mulieres, et Herveus de Traveciaco, miles, una cum dictis Stephano et Philippo, in ballo ipsius Hervei existentibus, sibi fuisse a dictis decano et capitulo plenarie satisfactum in pecunia numerata, renunciantes, etc... dictosque decanum et capitulum ex dictis trecentum et decem octo libris turonensium in perpetuum quitaverunt. Et de hiis omnibus et singulis predictis venditionibus dicti venditores omnes, tam viri quam mulieres, se desaisierunt in manu dicti archidiaconi, et existentem ipsum archidiaconum nomine et loco dictorum decani et capituli totaliter saisiverunt et investiverunt, et dominium, jus, possessionem et proprietatem et quicquid plus juris in omnibus dictis decimis habebant in presentiarum et habere poterant in sepedictum archidiaconum loco et nomine dictorum decani et capituli totaliter transtulerunt ; et hanc venditionem fecerunt pro rata sua dictarum omnium decimarum dicti Philippus et Stephanus, de auctoritate et assensu dicti Hervei, qui et frater suus asseruerunt per fidem manu super hoc datam quod dicta rata ipsorum Philippi et Stephani de dictis decimis erat inutilis ipsi Stephano et Philippo, et juraverunt ipsi Herveus et frater ejus super sancta Dei Evangelia quod junior ipsorum Philippi et Stephani decimum quartum annum et amplius compleverat. Mater vero dicti Guillelmi Jodoini dictas venditiones voluit et concessit et totam dotem,et si quod aliud jus in omnibus dictis decimis habebat et habere poterat, dictis decano et capitulo quitavit in perpetuum et dimisit. Dictus vero Guillelmus Jodoini, a quo, ut dicebat idem Guillelmus Jodoini, predicte omnes sorores sue et dictus Colinus ratam suam ex dictis decimis venditam tenebant in feodum, dictam venditionem a dictis sororibus suis et dicto Colino factam voluit et laudavit et totum feodum suum ammortificavit, et concessit quod dictas decimas omnes teneant et possideant in manu mortua decetero dicti decanus et capitulum libere et quiete. Promiserunt insuper predicti omnes venditores, etc... immo promiserunt, etc... Preterea promiserunt dicti Herveus et frater ejus quod procurabunt et efficient erga dictos Stephanum et Philippum, quos habebat in ballo suo idem Herveus, ut dicebat, cum ad etatem viginti quinque annorum devenerint, quod dictas venditiones ratas habebunt coram nobis vel officialem Aurelianensem qui pro tempore fuerit, et acceptas, et quod aliqua racione non venient contra aliquid de predictis, et quod in omnibus dictis decimis nichil per se vel per alium reclamabunt, per fidem ab ipsis Philippo et Stephano super hoc tunc prestandam. Et pro hiis omnibus et singulis predictis tenendis in perpetuum et implendis, et de non veniendo contra aliquid de predictis dicti Colinus, Guillelmus Jodoini et mater et sorores ejus, Guillelmus de Ponte, Johannes Jodoini, Petrus, uxor ejus, Herveus et frater ejus fidem suam in manu dicti Jacobi corporaliter prestiterunt, et dicti Philippus et Stephanus coram eodem Jacobo prestiterunt super sancta Dei Evangelia sacramentum. Item pro hiis omnibus et singulis predictis tenendis in perpetuum et implendis dicti venditores, tam viri quam mulieres, et dicti Herveus et frater ejus dictis fide et juramento se et omnes heredes et successores suos et omnia bona sua et heredum et successorum suorum mobilia et immobilia, presentia et futura memoratis decano et capitulo specialiter obligarunt et supposuerunt jurisdictioni curie Aurelianensis, et asseruerunt dicte mulieres omnes per fidei dationem quodhec omnia et singula predicta faciebant spontanee, non coacte, etc... Guido vero, presbiter et curatus ecclesie de Fontanis, in cujus parrochia site sunt decime supradicte, dictas venditiones omnes coram dicto Jacobo voluit et concessit, salvo sibi jure quod habere in decimis novalium se dicebat ; et dedit fidem in manu dicti Jacobi quod in dictis decimis nichil decetero per se vel per alium reclamabit. In cujus rei memoriam et testimonium presentes litteras fecimus sigillo Aurelianensi curie roborari. Actum apud Fontanas anno Domini millesimo ducentesimo sexagesimo primo, in crastino sancti Vincencii mense januario.

Nos vero predictas omnes et singulas venditiones volumus, laudamus et tanquam immediatus et solus feodalis dominus approbamus et totum feodum nostrum ammortificamus ; promittentes bona fide nos contra dictam ammortificationem et contra predictas omnes et singulas venditiones decetero ratione aliqua non venire, et nos easdem omnes et singulas venditiones memoratis decano et capitulo in manu mortua perpetuo garantire. In cujus rei memoriam et testimonium presentes litteras fecimus sigilli nostri munimine roborari. Datum Aur[elianis] anno Domini millesimo ducentesimo sexagesimo primo, die jovis post purificationem Beate Marie virginis.

1Retenta justitia nostra ammortificamus hec omnia supradicta. Datum ut supra.