Universis presentes litteras inspecturis, officialis curie Aurelianensis salutem in Domino. Notum facimus quod in nostra presencia constituti Johannes de Plesseyo, domicellus, Ysania et Guillelmus, fratres, liberi Johanne de Bosco Gaudi, duas partes tractus, scilicet dictus Johannes et dicta Ysania et Guillelmus tertiam partem ipsius tractus quem se habere dicebant in quadam parte decime de Donesiaco, site citra rippariam de Donesiaco a parte ecclesie parrochialis ipsius loci, qui quidem tractus vocatur tractus Sancti Stephani, et quem tractum tenebant, ut dicebant, a capitulo Aurelianensi, vendiderunt et imperpetuum penitus quitaverunt viris venerabilibus decano et capitulo Aurelianensibus pro precio centum solidorum parisiensium, de quibus ipsi venditores se tenuerunt coram nos integre pro pagatis in pecunia numerata, exceptioni non numerate et non recepte pecunie renunciantes penitus et expresse, promittentes dicti Johannes et Ysania per fidem suam corporaliter prestitam, et dictus Guillelmus per juramentum suum coram nobis prestitum, quod dictum tractum, quilibet pro rata sua, predictis decano et capitulo in manu mortua legitime liberabunt, garentient et deffendent ad usus et consuetudines patrie imperpetuum contra omnes ; promiserunt etiam per fidem et juramentum predictum, quod si aliquis appareret qui dictum tractum diceret esse de dominio seu feudo suo, et dictos decanum et capitulum super dicto tractu in aliquo molestaret, quod ipsi eosdem decanum et capitulum erga ipsum et omnes alios servarent indempnes et honus litis in se susciperent suis propriis sumptibus et expensis, obligantes quantum ad hoc se et heredes suos et omnia bona sua mobilia et immobilia, presentia et futura ; et quantum ad predictam garentiam, ut dictum est, faciendam predictis decano et capitulo, Gaufridus de Plesseyo, frater dicti Johannis, et Robinus de Livercois, frater dictorum Ysanie et Guillelmi, pro ipsis venditoribus et ad eorum requisitionem erga dictos decanum et capitulum se constituerunt fide media fidejussores ad usus et consuetudines Aurelianenses. Preterea Johanna de Bosco Gaudi, mater dictorum Ysanie et Guillelmi, in nostra presentia constituta, dotalicium quod habebat in dicto tractu predictis decano et capitulo quitavit imperpetuum et dimisit, et promisit per fidem suam corporaliter prestitam quod in dicto tractu, ratione dotalicii vel alia, nichil decetero reclamabit. Renuntiantes etc... In cujus rei memoriam et testimonium sigillum Aurelianensis curie litteris presentibus duximus apponendum. Datum anno Domini millesimo ducentesimo septuagesimo sexto, die veneris post octabas sancti Martini hyemalis mense novembris.

Thomas.