Ego Hugo Buticularius, miles, notum facio universis presentes litteras inspecturis, quod cum karissimus dominus meus Ludovicus, rex Francorum illustris, occasione cujusdam facti quod super occisione clericorum Aurelianis facta michi imponebatur, per dictum et ordinationem suam duodecim libratas terre mee, ad opus cujusdam capellanie, Aurelianis faciende, retinuerit, et dilecti mei magister Johannes dictus Pullus, clericus ejusdem domini regis, et Adam Panetarius, baillivus Stampensis, de mandato ipsius domini regis pro dictis duodecim libratis annui redditus ad opus dicte capellanie assignaverint et tradiderint capitulo Aurelianensi quadraginta et octo arpenta terre, uno quaterio minus, sita apud Luières, inter Sanctum Germanum et fortericiam de Luières, juxta Haias ; ego, in mea libera potestate constitutus, tam ordinationem ab ipso domino rege factam, quam etiam assignationem et traditionem a prenominatis J. et A. factam capitulo memorato ratam habeo pariter et acceptam ; promittens et fidem corporalem prestans quod in dictis quadraginta et octo arpentis terre, uno quarterio minus, nichil per me vel per alium decetero reclamabo. Eustachia etiam, uxor mea, ad preces meas, tam ordinationem premissam quam etiam assignationem et traditionem supradictam spontanea voluit et concessit, promittens et fidem corporalem prestans quod in dicta terra, sicut dictum est assignata et tradita, ratione dotalicii vel alia quacumque ratione per se vel per alium nichil decetero reclamabit. In cujus rei testimonium presentes litteras sigilli mei munimine roboravi. Actum anno Domini MCC tricesimo sexto, mense decembri.