Omnibus presentes litteras inspecturis Johannes de Castellione, comes Blesensis et dominus Avenarum, salutem in Domino. Noverint universi quod cum inter nos, ex una parte, et venerabiles viros decanum et capitulum Aurelianenses, ex altera, controversia verteretur super hoc videlicet quod nos dicebamus nos esse in possessione et saisina sanguinis et violentie in villa de Noemio super Ligerim, predictis decano et capitulo hoc negantibus et dicentibus dictos decanum et capitulum esse et usos fuisse possessione et saisina predicte justicie sanguinis et violentie ; item et cum questio esset inter nos et dictos decanum et capitulum super hoc quod nos dicebamus et adhuc dicimus nos esse in possessione vel saisina habendi tensamentum1 super hospitibus excolentibus terram in territorio Sancte Crucis in Belcia, cujusmodi tensamentum dicebamus nos debere levare et habere per nos vel per mandatum nostrum, licentia dicti capituli super hoc minime requisita, dictis decano et capitulo dicentibus quod dictum tensamentum levare non poteramus nec debebamus sine mandato dicti capituli, et super modo levationis dicti tensamenti esset inquesta facta de mandato domini regis. Item et cumesset controversia inter nos et dictos decanum et capitulum super hoc quod nos dicebamus dictum capitulum emisse terras in villa de Villecoch et circa in feodo nostro, quod facere non poterat nec debebat, dictis decano et capitulo super hoc in contrarium rationes plurimas allegantibus. Item et super hoc quod dicti decanus et capitulum habebant in terra sua de Caprella quedam ligna ad terram jacentia, nomine furcarum et de quibus facte fuerant furce, que ligna de mandato nostro a dicto loco fuerant asportata, et dicti decanus et capitulum a nobis peterent quod nos predictum locum de predictis lignis faceremus resaisiri, et nos volumus et concedimus quod locus predictus predictis lignis resaisiatur et postmodum veritas justicie dictarum furcarum inquiratur. Tandem post multas altercationes super predictis habitas, de bonorum consilio, nos, ex una parte, et dicti decanus et capitulum, ex altera, in venerabiles viros magistrum R[enerium], Drocensem archidiaconum in ecclesia Carnotensi, et dominum Petrum de Marolio, decanum Magdunensem, et dominum Radulphum de Chevriaco, archidiaconum Parisiensem, a nobis et dictis decano et capitulo communiter desuper electum si duo predicti arbitri in unam non possent concordare sentenciam, cujus sententia cum altero predictorum prevaleret, super omnibus et singulis predictis controversiis compromittimus pace vel judicio a dictis arbitris terminandis. Promittentes, etc... Qui arbitri suum debent proferre arbitrium infra Assumptionem beate Marie virginis proximo venturam. Volumus autem et concedimus quod si, pendente dicto compromisso, aliqua justicia in villa de Noemio evenerit facienda super illis super quibus est compromissum, quod dicta justicia per manus dictorum arbitrorum exerceatur. Necnon concedimus et volumus quod super inquesta facta de mandato domini regis super dictis tensamentis salve sint raciones hinc et inde, sicuti salve erant in curia domini regis, et quod dicta inquesta valeat coram dictis arbitris ac si facta esset ab eisdem. Volumus autem et concedimus quod dicti arbitri inquirant de omni usu et de omnibus aliis que faciunt ad probationem saisine justicie predicte violentie et sanguinis ville de Noemio, et illi parti que melius probaverit intentionem suam quantum ad saisinam a dictis arbitris saisina adjudicetur. In cujus rei memoriam et testimonium presentes litteras nostri sigilli munimine fecimus roborari. Datum Parisius anno Domini millesimo ducentesimo sexagesimo secundo, die jovis in festo cathedre beati Petri.