Universis presentes litteras inspecturis officialis curie Aurelianensis salutem in Domino. Noveritis quod in presentia Odonis de Baudrevilla, clerici curie Aurelianensis, notarii jurati ad hoc a nobis specialiter destinati, cui in hoc et majoribus fidem indubitatam adhibemus, constituti Odo de Oestro et Amelina, ejus uxor, tres pecias terre arabilis quas se habere dicebant, unam videlicet super cheminum qui ducit de Aur[elianis] Carnoti et ad Limolinum sitam, ab oppositis cujusdam alterius pecie terre contigue terre capituli Aurelianensis in territorio ipsius capituli de Unello, in decimaria et campiparte dicti capituli, et aliam peciam terre super viam que ducit de Unello ad Provencheriam, inter terram dicti capituli in dicto territorio de Unello et terram Guillelmi Viatoris, alteram vero peciam terre super dictam viam inter terram dicti capituli et terram dicti Guillelmi Viatoris et defuncti Roberti de Unello in decimaria et campiparte dicti capituli sitas, permutaverunt et nomine permutationis dederunt et concesserunt imperpetuum et penitus dimiserunt dicto capitulo Aurelianensi pro tribus peciis terre arabilis quas dictum capitulum habebat, ut dicitur, unam vero peciam terre apud Provencheriam, que vocatur Hochia decani, sitam super cheminum Aurelianensem et Carnotensem, contiguam ville de la Provenchiere et hochie deffuncti Gaufridi Pelerin in campiparte et decimaria dicti capituli, et aliam peciam terre versus locum qui dicitur Moules contiguam campo Vincencii de Unello, ex una parte, et campo Jobannis Barbe, ex altera, sitam in decimaria et campiparte dicti capituli, alteram vero peciam terre super cheminum qui ducit de Aurelianis Carnoti et ad Limolinum, contiguam campo liberorum deffuncti Roberti de Unello in decimaria et campiparte dicti capituli sitam, dominium, jus, possessionem et proprietatem omnium terrarum predictarum, ab eisdem Odone et Amelina dicto capitulo in permutationem, ut dictum est, concessarum, in bursarium ecclesie Aurelianensis vice et nomine dicti capituli totaliter transferendo et nichil juris penitus retinendo ; promittentes dicti Odo et Amelina per fidem suam super hoc prestitam corporalem quod contra predictas permutacionem, dacionem, concessionem seu contra predicta vel aliquid de predictis jure hereditario, racione dotis vel dotalicii nomine, seu qualibet alia racione sive causa per se vel per alium seu alios non venient in futurum nec venire aliquatenus attemptabunt, immo promiserunt per dictam fidem quod omnes res et singulas predictas in permutacionem, ut dictum est, datas dicto capitulo liberabunt, garentient et deffendent perpetuo contra omnes, et quantum ad omnia et singula supradicta tenenda et adimplenda dicti Odo et Amelina se et omnes heredes ac successores suos et omnia bona sua mobilia et immobilia, presencia et futura ubicumque existencia dicto capitulo per fidem suam obligarunt, supponentes se et sua quoad hoc jurisdictioni curie Aurelianensis ubicumque se duxerint transferendos. In cujus rei memoriam et testimonium presentibus litteris sigillum Aurelianensis curie duximus apponendum. Datum anno Domini millesimo ducentesimo septuagesimo, die jovis post festum Omnium Sanctorum.

Godin.