Ego Galerannus de Cranna, domini regis baillivus, notum facio presentibus et futuris quod Robertus de Valle Sancti Germani miles et uxor ipsius Emelina totam decimam suam quam habebant in territorio ville que Alnetum dicitur, inmediate de meo movente feodo, ecclesie Sancte Crucis Aurélianensis integre vendiderunt quiete et libere in perpetuum possidendam. Ego eciam, de cujus feodo movebatur, sicut dictum est, decima memorata, venditionem ejusdem decime a pretaxatis Roberto et Emelina factam ecclesie nominate approbavi et volui et eam concessi firmam et stabilem perpetuo permanere. Quod ut ratum et notum habeatur, presentes litteras feci sigilli mei caractere confirmari. Datum anno Domini millesimo ducentesimo vigesimo quinto, mense mayo.