In nomine Domini, Amen. Anno millesimo ducentesimo nonagesimo p[rimo], vicesima sexta die mensis septembris, indictione quinta pontificatus domini Nicholai pape nu^ti anno quarto, per hoc presens publicum instrumentum pateat uni-versis quod, in presencia mei publici notarii et testium subscriptorum presen[tia], discretus vir magister Johannes dictus Barat, clericus, arbiter seu arbitrator aut amicabilis compositor super discordia seu controversia que inter nobilem dominam Johannam, quondam uxorem nobilis viri comitis de Lantone(sic) ac comitissam Blesensem, ex parte una, et venerabiles viros decanum et capitulum Aurelianense, nomine ecclesie sue predicte, ex parte altera, vertebatur seu verti dicebatur super jurisdicione et justicia ville de Noemio super Ligerim, in territorio et pertinentiis decani et capituli predictorum, prout idem magister Johannes asserebat et prout etiam dicta domina comitissa ac venerabilis vir dominus Radulphus de Cheneveriis, juris civilis professor, et Guillelmus de Magduno, canonicus ecclesie Aurelianensis predicte, procuratores dictorum decani et capituli, prout in quibusdam procuratoriis litteris, sigillo capituli predicti, ut apparebat prima facie, sigillatis, dinoscebatur plenius contineri, procuratorio nomine predicto, presentes coram me et testibus subscriptis, confitebantur expresse ad requisicionem et de expresso consensu ipsorum domine comitisse et procuratorum, dictum seu arbitrium suum protulit in hunc modum :

A touz ceus qui verront cestes presentes letres, Gie Johanz dit Barat, clerc, salut. Sachent, etc... 1

Prolato autem dicto seu arbitrio predicto, memorati comitissa et dominus Radulphus de Cheneveriis ac Guillelmus de Magduno, procuratores decani et capituli predictorum, presentes suo ac procuratorio nomine predicto, habentes inter cetera potestatem et mandatum ratifficandi, aprobandi et emologandi arbitrium seu ordinacionem quod vel quam dictus magister Johannes arbitrator duxerit proferendum vel proferendam, dictum et ordinationem predictas, prout superius sunt expresse, voluerunt, laudaverunt, approbaverunt et emologaverunt expresse, et promiserunt hincinde, tam dicta comitissa quam procuratores predicti procuratorio nomine predicto, predictas dictum et ordinacionem tenere, servare et adimplere et contra premissa aut aliqua de premissis se quacumque racione vel causa in posterum non venturos. Actum apud Boloniam, domum ejusdem comitisse, in diocesi Carnotensi anno, mense, die et indictione predictis, presentibus una cum dictis comitissa et procuratoribus religioso viro fratre Symone Marquieiz, de ordine fratrum Minorum, et discretis viris magistris Sancio, ballivo domini Aurelianensis episcopi, Bartholite(?) Clausarii , canonico ecclesie S. Salvatoris Blesis, et Michaele Guillardi, clerico, ac Guillelmo dicto de Hangest, baillivo dicte domine comitisse, cum Laurentio de Ascheriis, clerico dicti magistri Johannis Barat, cum aliis fidedignis.

Et ego Guillelmus de Bosco communi, Senonensis diocesis, clericus, auctoritate sacrosancte Romane Ecclesie publicus et Aurelianensis curie notarius, premissis arbitrii prolacioni, confessioni, aprobacioni et emologationi et aliis actis anno, mense, die, indictione et loco una cum dictis testibus presens vocatus interfui, presensque hoc publicum instrumentum propria manu scripsi et in hanc publicam formam redegi, meoque consueto signo signavi rogatus.