Officialis curie Aurclianensis omnibus presbiteris, prioribus, capellanis celerisque ecclesiarum rectoribus, necnon omnibus doctoribus in quacunque facultate Aurelianis regentibus, ad quos presentes littere pervenirent, salutem in Domino. Cum nos ex parte Johannis de Monasteriis, clerici et procuratoris venerabilis viri magistri Galteri de Bellotorti, thesaurarii Morinensis, nomine procuratorio, querimoniam receperimus continentem quod cum viri venerabiles decanus et capitulum Aurelianensis ecclesie, associatis sibi clericis ejusdem ecclesie, accessissent de novo ad domum quam inhabitare consuevit discretus vir magister Galterus de Belloforti predictus, domumque ipsam vi introissent, et cum ipsis plures iniquitatis filii, clerici et laici, quidam ex ipsis, Deum pre oculis non habentes, multa de bonis dicti procuratoris et domini sui furtive subripuerunt et asportarunt ; nosque monitione mandassemus malefactoribus hujusmodi ut ipsa dicta bona substracta furtive per ipsos redderent loco dictorum procuratoris et domini sui, et scientes ipsos malefactores priori fratrum Predicatorum revelarent, alioquin nos [contra] tam malefactores quam scientes sententiam excommunicationis protulerimus, nos predictas monicionem et excommunicationis sententiam, ex causa quia de furto lati sunt, in hiis scriptis revocamus ; quod omnibus quorum interest tenore presentium intimamus. Datum dominica die in vigilia Assumpcionis beate Marie Virginis, anno Domini millesimo trecentesimo.