33- Gregorius, p. et c.

33.N

Et nota quod iste plene compilavit vitam beati Gregorii, et in .IIII. libros digessit, cum prius minus plene descripta haberetur. Unde utraque legenda hodie invenitur in multis libris.

33.1 Lectio prima.

Gregorius genere Romanus ' arte philosophus ' Gordiani ' et beate Silvie filius * tam nobilissimam quam etiam religiosissimam genealogiam duxit + ita ut Felix Sedis Apostolice pontifex ' ejus attavus ' et beata virgo Tarsilla que moritura promissionis celestis audivit armoniam * amita ejus extiterit. Hic presagio quodam ' Gregorius quod grece « vigilans » resonat * vocatus est. Nam recta que docturus erat ' dum adimplevit ' sibimet + dum recta que faciebat ' docendo disseruit * vigilasse dinoscitur futuri temporis christianis.

• < BHL 3641

33.2 Lectio secunda.

Denique docibilis adolescens cum ad bivium pittagorice littere pervenisset * sinistrum ramum cum seculi voluptate relinquere ' et ad dextrum cepit cum celesti desiderio hanelare. Sed dum tutius se Christo famulaturum putaret ' si sub pretoris habitu mundo specie tenus deserviret + ceperunt multa contra eum succrescere * ut non jam specie sed in eo retineretur et mente. Tandem patre orbatus sex monasteria in Sicilia * septimum vero intra Urbis menia fabricavit. In quo multis sibi sociatis fratribus * regulari tramite militavit.

33.3 Lectio tercia.

Postea vero cum subesse mallet * fratrum votiva concordia innuente ' preesse non renuit. Erat autem ei abstinentia tanta ciborum  ' et sedulitas orationum * ut infirmato stomacho vix subsistere videretur. Verum quamquam cotidiano langore tabesceret + nullam tamen corpori suo cupiebat commodare qu[i]etem * quominus aut oraret ' aut legeret ' aut scriberet ' aut dictaret. In hujus monasterii penetralibus * a matre Silvia crudis leguminibus pascebatur.

33.4 Lectio quarta.

Denique cernens benedictus pontifex Gregorium ad alta conscendere * violenter eum levitam septimum ' ad suum adjutorium consecravit. Nec multo post ' ad Urbem Constantinopolim a Pelagio presule destinatur * ubi vite celestis non intermisit propositum. Secuti namque sunt eum multi ex suo monasterio fratres * germana devicti caritate. Et dum causarum secularium continuatis vertiginibus fluctuabat * ad illorum consortium ' velut ad tutissimi portus littora ' refugiebat.

33.5 Lectio quinta.

Igitur postquam Romam reversus est * Pelagio papa defuncto ' eum licet totis viribus renitentem ' clerus ' senatus ' populusque Romanus ' sibi concorditer pontificem elegerunt. Sed ipse imperatori Mauritio cujus filium ex lavacro sancto susceperat ' latenter litteras destinavit * adjurans ne assensum preberet. Sed prefectus Urbis ' nuntium anticipavit * disrupitque epistolas. Cognovit tandem suas litteras interceptas. Et quia palam portam ingredi civitatis non poterat * dissimulato ut fertur habitu ' cavernarum latibula requisivit. In quibus dum quereretur * indicio columne fulgide super se a celo dependentis ' agnoscitur. Captus ergo trahitur * et summus pontifex consecratur.

33.6 Lectio sexta.

Hic primus omnium ' se in principio epistolarum suarum ' « servum servorum Dei » scribi * diffinivit. Cotidie ' ad mensam suam peregrinos quoslibet invitabat. Omnibus pauperibus * suo tempore frumentum ' caseum ' et hujusmodi dividebat. Ditiora vero commercia primoribus honorabiliter offerebat * ita ut quedam orrea communis putaretur Ecclesia. Tribus milibus ancillis Dei * pro cotidianis stipendiis octoginta libras auri ' annualiter offerebat. Per omnium regionum vicos * infirmis stipendia per constitutos veredarios emittebat. Verecundioribus vero a mensa sua dirigere curabat scutellam.

33.7 Lectio septima.

[196b]

Ceterum Ierosolimis ' cenodochium constituit * et tam ibi quam in monte Syna ' Dei famulis cotidiam victus et vestimenti copiam ' annualiter mittere procuravit. Heremita quidam orasse fertur ad Dominum * ut sibi ostendere dignaretur quam future remunerationis sperare mansionem debuisset. Cumque dormiret * cognovit sibi revelatum ' ut cum Gregorio mansionem sperare deberet. At ille ingemiscens ' parum sibi profuisse inopiam estimabat + si cum eo mansionem reciperet * qui tantis divitiis redundaret. Alia vero nocta * audivit Dominum sibi dicentem : « Cur audes paupertatem tuam Gregorii divitiis comparare + qui magis catam illam quam habes diligere comprobaris ' quam ille tantas divitias ? »

33.8 Lectio octava.

Tandem anno imperii Fote1 secundo * a carnis corruptione subtractus est. Cum autem sicut a majoribus traditur ' calumniarum veterum incentores ' ipsum prodigum ' dilapidatoremque perstreperent * ad comburendos libros ejus ceperunt hanelare. Quorum dum quosdam jam combussissent + Petrus diaconus ejus ' obstitit * dicens ' immane sacrilegium esse tanti Patris libros exurere ' super cujus caput ipse Spiritum in specie columbe frequentissime conspexisset.

33.9 Lectio nona.

Cumque populum cerneret cum invidis resultare * in hoc omnium dicitur sententiam provocasse + ut si ' quod dixerat jurejurando confirmans ' mori continuo meruisset * ipsi a librorum exustione desisterent. Si vero superstes sui testimonii extississet * ipse cum combustoribus manus daret. Itaque cum evangeliis in ambone ascendens ' mox ut gregoriane sanctitati testimonium perhibuit * inter verba Spiritum efflavit. Gregorius quoque in comparatione tractatus alterius ' dictatum suum furfur nominans * libros suos legi quamdiu vixit prohibebat.