*18- S12 a « Deus omnium »
Sabbato duodecimo.
Sermo ejusdem. Å .
*18.1 Lectio prima.
Merito sancta et venerabilis Dei genitrix Maria ' Celorum regina ' mundi domina ' singulari1 a nobis preconio extollitur * que singulare commercium mundo prebuit. Denique tantum se ad Celi fastigia sublevavit * ut Verbum in principio apud Deum de summa Celi arce susciperet. O felix Maria et omni laude dignissima ' immaculata coitu ' fecunda partu ' virgo lactans dominum Celi ' angelorum cibum et hominum nutriens + quas tibi laudes, o domina ' totius mundi salvatio ' fragilitas humani generis persolvet ' que solo tuo commercio recuperandi aditum invenit ? O gloriosam feminam * que dolori non subjacuit post partum ' nec labori post transitum !
- Ps. Ildefonsus, s dub. 9, PL 96, c. 271D-272A.
- CPL 1257, CPP 2311 et 5265
*18.2 Lectio secunda.
O admirabilis thalamus de quo speciosus prodiit sponsus ' lux gentium, spes fidelium ' tabernaculum glorie ' templum celeste + cui apostoli sacrum reddunt obsequium ' ad cujus glorie angeli cantum triumphum * quam Christus amplexatur. O beata Maria que de terris ad celestem vitam translata es ab angelis * et, inter choros virginum, sicut sol fulgens suscepisti principatum super archangelos in Celo ! O excellentissima quam paradysus excepit gaudens + quam Cherubin et Seraphyn cum laudibus prosequ[u]ntur * quam martires candidati beatificant + quam sanctorum confessorum stolatus concelebrat numerus * cui omnium sanctarum cum suis palmis victricibus exultat exercitus.
- ibid. c. 272AB.
*18.3 Lectio tercia.
O clarissima inter virgines virgo sancta '
genitrix Christi piissima ' succurre miseris ad te confugientibus + veniam tribue poscentibus * adjuva et refove omnes qui in te confidunt. Ora pro totius mundi piaculis + interveni pro clero ' intercede pro monachorum choro * exora pro devoto femineo sexu. Sentiant omnes clementiam tuam * quicumque invocant tuum gloriosum nomen. Sit tibi compassio super afflictione captivorum * sit pius affectus super peregrinos celorum.2 Et quia te sine fine gaudentem atque letantem aspicis * quesumus ut preces nostras quas tibi cum fletibus fundimus ad Deum ipsa admittas + eumque ut proprium filium pro nobis interpelles ' ut cum ille in fine seculi judex apparuerit ' cum ipso et nos appareamus in gloria * qui cum Patre et Spiritu Sancto vivit et regnat per infinita secula seculorum, amen.
- ibid. c. 272BC.
