École des chartes » ELEC » Le sanctoral du lectionnaire de l'office dominicain (1254-1256) » [DE BEATA VIRGINE IN SABBATIS] » *22- S16 a « Deus omnium »

*22- S16 a « Deus omnium »

Sabbato sexto decimo.

Item oratio ejusdem. Å .

*22.1 Lectio prima.

Virgo mundo venerabilis ' mater humano generi amabilis ' femina angelis mirabilis ' Maria sanctissima ' cujus beata virginitate omnis sacratur integritas ' cujus glorioso partu omnis salvatur fecunditas ' domina magna, cui gratias agit territa turba reorum * ad te, prepotens et misericors domina ' nos peccatores et utique nimis peccatores anxii confugimus. Videntes enim nos, domina, ante districti Judicis omnipotentem justiciam ' et considerantes ire ejus intolerabilem vehementiam * perpendimus peccatorum nostrorum enormitatem ' et condignam tormentorum immanitatem. Tanto igitur horrore turbati ' tanto pavore perterriti + cujus obnixius implorabimus interventionem ' quam illius cujus uterus mundi fovit reconciliationem ?

  • Anselmus Cantuariensis, Oratio 6, ibid., p. 15, l. 4-14.

*22.2 Lectio secunda.

O domina clementissima + unde securius velocem in necessitate subventionem sperabimus ' quam unde mundo propiciationem scimus ? Aut cujus intercessio facilius nobis reis impetrabit veniam ' quam illius que illum generalem et singularem1 justum ultorem ' et misericordem Salvatorem lactavit ? Sicut enim, beatissima, impossibile est ut hec merita, tibi tam singularia ' nobis tam necessaria2 ' obliviscaris * sic, mitissima, incredibile est ut supplicantibus miseris non miserearis. Bene quippe novit mundus ' nec nos mundi peccatores ullatenus dissimulare patimur * satis, inquam, o domina, satis novimus ' quis Filius hominis ' vel cujus hominis Filius ' venit salvum facere quod perierat. Nunquid ergo, tu, domina nostra ' mater spei nostre, nunquid oblivisceris tu odio nostri, quod mundo tam misericorditer est intimatum ' tam feliciter divulgatum ' tam amanter amplexatum ?

  • ibid. p. 15-16, l. 14-25.

*22.3 Lectio tercia.

O mater misericordie ' ille bonus Filius hominis, filius tuus, venit perditos sponte salvare + et mater Dei poterit perditos clamantes non curare ? Bonus ille Filius hominis venit vocare peccantes ad penitentiam + et bona mater Dei contempnet precantes in penitentia ? Ille, inquam, bonus Deus ' mi(t)tis homo ' misericors Filius Dei ' pius Filius hominis ' venit querere peccatores errantes + et tu, bona mater ejus ' potens mater Dei ' repelles miseros orantes ? Ecce enim, o virgo, homo ' de qua natus est homo Deus ' ut salvaretur peccator homo ' ecce coram bono filio tuo et coram bona matre ejus penitent ' et confitentur * gemunt et orant peccatores homines. Obsecramus ergo vos, bone Domine ' et bona domina ' obsecramus vos, Fili pie et pia mater + obsecramus vos per ipsam veritatem ' per hanc singularem spem peccatorum * ut sicut vere tu es filius ejus ' et tu mater ejus ' sic, sic absolvantur et curentur ' sanentur ' et salventur hi peccatores.

  • ibid. p. 16, l. 26-38.

1 singularem] sigularem a.c.
2 nobis... neccessaria] add. in marg.