*10- S4 a « Deus omnium »

*10.1 Lectio prima.

Virga de radice Jesse procedens [Is. 11, 1] ' virgo Dei genitrix est * flos filius ejus. Flos utique Virginis Filius est * flos candidus et rubicundus ' electus ex milibus. Flos in quem prospicere desiderant angeli + flos ad cujus odorem reviviscunt mortui * flos utique campi et non orti. Campus enim sine omni humano floret adminiculo + non seminatus ab aliquo ' non defossus sarculo * non impinguatus fimo. Sic omnino ' sic floruit Virginis alvus * sic inviolata ' integra ' et casta Marie viscera ' tanquam pascue eterni viroris florem protulere + cujus pulchritudo non videat corruptionem * cujus gloria in perpetuum non marcescat. O Virgo, virga sublimis + in quam sublime verticem sanctum erigis * usque ad sedentem in throno ' usque ad Dominum majestatis. Neque mirum * si in altum mittis radices humilitatis.

• Bernardus Claraevallensis, s 2 in Adventu, Opera IV (1966), p. 173, l. 10-20.

*10.2 Lectio secunda.

O virgo, vere planta celestis * planta preciosior cunctis ' sanctior universis. O vere lignum vite * quod solum dignum fuit portare fructum salutis.

Virgo hec regia, carissimi, via est ' per quam Salvator advenit * procedens ex ipsius utero tanquam sponsus de thalamo suo. Tenentes igitur ipsam viam esse per quam ad nos venit Salvator * studeamus, dilectissimi, ad ipsum per eam ascendere, qui per ipsam ad nos descendit. Studeamus per eam venire in gratiam ipsius * qui per eam in nostram miseriam venit. Per te accessum habeamus ad Filium, o benedicta ' inventrix gratie ' genitrix vite ' mater salutis * ut per te suscipiat nos ' qui per te datus est nobis.

• ibid. p. 173, l. 20-22 et p. 174, l. 5-12.

*10.3 Lectio tercia.

Excuset apud filium tuum virgo mater ' integritas tua culpam nostre corruptionis * et humilitas tua Deo grata ' nostre veniam impetret vanitati. Copiosa caritas tua ' nostrorum cooperiat multitudinem peccatorum * et fecunditas gloriosa ' fecunditatem nobis conferat meritorum. Domina nostra, mediatrix nostra ' advocata nostra ' tuo Filio nos reconcilia + tuo Filio nos commenda * tuo Filio nos representa. Fac, o benedicta, per gratiam quam invenisti ' per prerogativam quam meruisti ' per misericordiam quam peperisti * ut qui, mediante te, fieri particeps dignatus est infirmitatis et miserie nostre + te quoque intercedente, participes faciat nos glorie et beatitudinis sue * Jesus Christus, Filius tuus, Dominus noster ' qui est super omnia Deus benedictus in secula ' amen.

• ibid. p. 174, l. 12-22.