École des chartes » ELEC » Le sanctoral du lectionnaire de l'office dominicain (1254-1256) » [DE BEATA VIRGINE IN SABBATIS] » *21- S15 a « Deus omnium »

*21- S15 a « Deus omnium »

Sabbato quinto decimo.

Oratio Anselmi. Å .

*21.1 Lectio prima.

Sancta et inter sanctos post Deum singularis sancta ' mater admirabilis virginitatis ' virgo amabilis fecunditatis ' domina prefulgens tanta sanctitate ' supereminens tanta dignitate ' quam utique certum est non minori preditam esse potentia et pietate + tibi, o genitrix Vite ' o mater salutis ' templum misericordie et pietatis ' tibi sese conantur presentare miserabiles anime nostre * morbis vitiorum languide ' vulneribus facinorum succise ' ulceribus flagiciorum putride. Tibi nituntur, quantum moribunde valent, supplicare * ut potentibus tuis meritis ' et tuis piis precibus ' digneris eas sanare. Sic autem, pia domina, sordibus et fetore fedantur * ut timeant ne ab ipsis misericors vultus avertatur tuus. Sic tabescunt desperando respectus tui conversionem * ut etiam os obmutescat ad orationem. Peccata nequitie, cur sic facitis animas ' vestra feditate horrendas + ut miseratio non possit aspicere illas ? Heu pudor sordentis iniquitatis * in presentia nitentis sanctitatis ! Heu confusio immunde conscientie * in conspectu fulgentis mundicie !

  • Anselmus Cantuariensis, Oratio 5, Opera II, vol. 3, p. 13, l. 4-23.

*21.2 Lectio secunda.

O benedicta super mulieres ' que angelos vincis puritate ' sanctos superas pietate + anhelant moribundi spiritus nostri ad tante benignitatis respectum * sed erubescunt ad tanti nitoris conspectum. Rogare enim te, domina, desideramus ' ut, miserationis tue respectu, cures plagas et ulcera peccatorum nostrorum * sed confundimur coram te ' ob fetorem et sordes eorum. Horremus, domina, apparere tibi in immundiciis et horroribus nostris ' ne tu horreas nos pro eis * et non possumus, ve nobis, videri sine eis. Eadem peccata nostra, o domina, cognosci a te cupiunt propter curationem * sed apparere tibi fugiunt propter execrationem. Non sanantur sine co[n]fessione * non produntur sine confusione.1 Si celantur, sunt insanabilia * si videntur, sunt detestabilia. Urunt dolore * terrent timore. Mole obruunt + pondere premunt * pudore confundunt.

  • ibid. p. 13-14, l. 24-37.

*21.3 Lectio tercia.

O tu illa pia potens ' et potenter pia ' de qua fons est ortus misericordie * ne contineas precamur tam veram misericordiam ' ubi2 tam veram cognoscis miseriam. Si [228c] enim nos confundimur in obscenitate iniquitatum nostrarum ad fulgorem tue sanctitatis + tu, ne, domina, erubesces erga miseros affectu insite pietatis ? Si nos confitemur nequitiam nostram + tu ne abnegabis benignitatem tuam ? Si major est miseria nostra quam nobis expediat + eritne minor misericordia tua quam te deceat ? Quanto enim, domina, magis delicta nostra in conspectu Dei et tuo sordent * tanto magis ejus curatione et tua subventione egent. Sana ergo, clementissima, infirmitatem * et delebis que te offendit feditatem. Aufer, benignissima, languorem * et non senties quem horres fetorem. Fac, piissima, ut non sit quod dolet * et non erit quod sinceritati tue sordet. Fac, domina, exaudi, domina * sana animas peccatorum servorum tuorum per veritatem benedicti fructus ventris tui ' qui sedet in dextera omnipotentis Patris sui ' superlaudabilis ' et supergloriosus in secula, amen.

  • ibid. p. 14, l. 38-51.

1 non produntur sine confusione] add. in marg.
2 ubi] ubi tam veram misericordiam ubi a.c.