École des chartes » ELEC » Le sanctoral du lectionnaire de l'office dominicain (1254-1256) » [DE BEATA VIRGINE IN SABBATIS] » *15- S9 a « Deus omnium »

*15- S9 a « Deus omnium »

Sabbato nono.

Idem in omelia super « Missus est Gabriel ». Å .

*15.1 Lectio prima.

Felix Maria * cui nec humilitas defuit ' nec virginitas. His nimirum Virgo regia gemmis ornata virtutum ' specie sua et pulchritudine sua in celestibus cognita ' civium celestium in se provocavit aspectus * ita ut ' et regis animum in sui concupiscentiam inclinaret ' et celestem nuntium ad se de supernis educeret.

Letare, pater Adam ' sed magis tu, o Eva mater, exulta * qui omnium fuistis prius peremptores quam parentes. Ambo, inquam, consolamini super filia et tali filia + sed illa amplius * illa de qua ortum est malum prius ' cujus obprobrium in mulieres pertransiit.

Propterea curre, Eva, ad Mariam * curre, mater, ad filiam. Filia pro matre respondeat + ipsa matris obprobrium auferat * ipsa Patri pro matre satisfaciat + quia ecce si vir cecidit per feminam * jam non erigitur nisi per feminam.

  • Bernardus Claraevallensis, h 2 in laudibus virginis Mariae, Opera IV (1966), p. 22, l. 7-13, l. 22-26 et p. 23, l. 2-5a.

*15.2 Lectio secunda.

Reddita est femina pro femina ' prudens pro fatua ' humilis pro superba * que pro ligno mortis ' gustum tibi porrigat vite * et pro venenoso cibo illo amaritudinis ' dulcedinem pariat fructus eterni.

O admirandam * et omni honore dignissimam Virginem ! O feminam singulariter venerandam + super omnes feminas admirabilem * parentum reparatricem ' posterorum vivificatricem. Missus est, inquit, angelus ad Virginem [cf. Luc. 1, 26-27]  + virginem mente ' virginem carne ' virginem professione * virginem denique qualem describit Apostolus ' sanctam mente et corpore + nec fortuitu, nec noviter inventam ' sed a seculo electam ' ab Altissimo precognitam ' et sibi preparatam * ab angelis servatam ' a Patribus presignatam ' a prophetis promissam.

  • ibid. p. 23, l. 10-12 et 16-23.

*15.3 Lectio tercia.

Scrutare Scripturas *

et vide quam pulchre et concorditer sanctorum mira [227d] facta ' et mistica dicta ' sibi invicem concinunt. Vide quam stupendum sit hoc unum de Virgine ' et in Virgine factum miraculum ' quod tot miracula prevenerunt * tot oracula promiserunt. Unus nimirum fuit spiritus prophetarum * licet diversis modis ' signis et temporibus ' eandem rem diversi non diverso spiritu ' et previderint ' et predixerint. Quod enim Moysi monstratum est in rubro et igne ' Aaron in virga et flore ' Gedeoni in vellere et rore * hoc aperte vidit Salomon in forti muliere et precio ejus ' apertius precinit Jeremias de femina et viro + apertissime Ysaias de virgine et Deo * et Gabriel tandem exhibuit ' ipsam virginem salutando.

  • ibid. p. 23, l. 23 ; p. 28, l. 23-28 et p. 29, l. 1-4.

a Egalement utilisé en 118.1-2a.