École des chartes » ELEC » Le sanctoral du lectionnaire de l'office dominicain (1254-1256) » [DE BEATA VIRGINE IN SABBATIS] » *26- S20 a « Deus omnium »

*26- S20 a « Deus omnium »

Sabbato vicesimo.

Idem in eadem oratione. Å .

*26.1 Lectio prima.

O virgo benedicta et superbenedicta * per cujus benedictionem benedicitur omnis natura ' non solum creata a Creatore ' sed et Creator a creatura ! O nimis exaltata, quam sequi conantur affectus animarum nostrarum + quo aufugies acies mentium nostrarum ? O pulchra ad intuendum ' amabilis ad contemplandum ' delectabilis ad amandum + quo evadis capacitatem cordium nostrorum ? Prestolare, domina * infirmam animam te sequentem. Ne abscondas te, domina, parum videnti anime te sequenti * miserere, domina, animam post te hanelando languentem. Mira res * in quam sublime contemplor Mariam locatam. Nichil equale Marie * nichil nisi Deus majus Maria. Deus filium suum, quem solum de corde suo equalem sibi genitum tanquam seipsum diligebat, dedit Marie eundem ipsum * ut naturaliter esset unus idemque communis filius Dei ' et Marie.

  • Anselmus Cantuariensis, Oratio 7, ibid., p. 21-22, l. 85‑97.

*26.2 Lectio secunda.

Omnis natura a Deo est creata * et Deus ex Maria est natus. Deus omnia creavit * et Maria Deum generavit. Deus qui omnia fecit ' ipse se ex Maria fecit * et sic omnia que fecerat refecit. Qui potuit omnia de nichilo facere * noluit ea1 violata nisi prius fieret Maria reficere. Deus igitur est pater rerum creatarum * et Maria mater rerum recreatarum. Deus est pater constitutionis omnium * et Maria est mater restitutionis omnium. Deus enim genuit illum per quem sunt omnia facta * et Maria peperit illum sine quo omnino nichil bene est. O vere Dominus tecum * cui dedit Dominus ut omnis natura tantum tibi deberet secum. Maria, obsecramus te, per gratiam qua sic Dominus tecum et te voluit esse secum '+ fac propter ipsam gratiam eandem misericordiam tuam nobiscum * fac ut amor tui semper sit nobiscum ' et cura nostri semper sit tecum.

  • ibid. p. 22, l. 97-111.

*26.3 Lectio tercia.

Fac, obsecramus, o beata Maria, ut clamor necessitatis nostre, quamdiu ipsa persistit, sit tecum * et respectus pietatis tue, quamdiu nos subsistimus, sit nobiscum. Fac ut congratulatio beatitudinis tue semper sit nobiscum * et compassio miserie nostre, quantum nobis expedit, sit tecum. Sicut enim, o beatissima, omnis a te2 aversus ' et a te despectus ' neccesse e[s]t ut intereat * ita omnis ad te conversus et a te respectus ' ut pereat impossibile est. Sicut enim, domina ' Deus genuit Filium in quo omnia vivunt * sic, o tu flos virginitatis, genuisti eum per quem et mortui revivunt. Et sicut Deus per Filium suum beatos angelos a peccato servavit * ita tu, o decus puritatis ' per Filium tuum miseros homines ex peccato salvasti. Non enim est reconciliatio nisi quam tu casta concepisti + non est justificatio nisi quam tu integra in utero [229b] fovisti * non est salus nisi quam tu, Virgo, peperisti. Ergo, o domina, mater es justificationis et justificatorum + genitrix es reconciliationis et reconciliatorum * parens es salutis et salvatorum.

  • ibid. p. 22-23, l. 111-126.

1 ea] add. in marg.
2 a te] rep. a.c.