École des chartes » ELEC » Le sanctoral du lectionnaire de l'office dominicain (1254-1256) » [DE BEATA VIRGINE IN SABBATIS] » *31- S25 a « Deus omnium »

*31- S25 a « Deus omnium »

Sabbato vicesimo quinto.

*31.N

Ex sermone « Hodierne etc. », qui attribuitur Augustino, sed magis videtur esse compositus ex diversis sanctorum dictis, eadem ratione qua precedens. Å .

*31.1 Lectio prima.

Videamus, fratres carissimi1, que sit hec virgo cujus hodie laudibus insistimus. Hec est Dei templum + fons signatus * et porta in domo Domini clausa.

Felix certe et omni laude dignissima * quia sine humano semine celestem seculo protulit panem ' et mundo genuit Salvatorem. O quam beata mater ista * que sine contaminatione ulla peperit medicinam ! Felix, inquam, mater, per quam nostri generis reparata est vita + que de Celo ' Dei suscepit prolem * et mundo genuit liberatorem ' et a peccatis et morte salvantem. Hec enim mirabili atque ineffabili modo * et omnium rerum ' et suum peperit creatorem. Electa quippe est Virgo integra, cui fecunditas matris daretur * et facta est fecunda mater ' in qua virginis integritas servaretur.

  • Ps. Alcuinus, h sup. 3, de nativitate BMV, PL 101, c. 1301D-1302B.

*31.2 Lectio secunda.

O felix Maria * que talem ac tantum nobis Redemptorem protulit ! O genitrix gloriosa * natus est ex te ' qui fecit te. Natus est ex te ' qui Moysi in igne flamme rubi apparuit. Natus est ex te, qui virgam Aaron sine aqua germinare fecit * et ex ea fructus produxit. Ex te natus est, qui pedibus super mare ambulavit + et de sepulchro ut leo surrexit * et in celis victor ascendit. Natus est ex te, cujus vultum desiderant angeli prospicere * ex te natus est, qui in se credentibus vitam tribuit sempiternam. O felix femina, letabilis angelis ' optabilis sanctis * minor est laus tua quam dignitas tua meretur. Intendat caritas vestra, dilectissimi. Hec mater Christi altior est celo * abysso est profundior. Merito ergo vocatur domina angelorum ' tremor infernorum * et domina gentium.

  • ibid. c. 1303BC.

*31.3 Lectio tercia.

Quid dignum, carissimi, referemus in laudem tam gloriose genitricis Dei ? Sileat nunc lingua carnis et demulceatur organis + plaudant tympana * sonent organa. Plaudite omnes gentes manibus * quoniam Dominus excelsus rex magnus super omnes celos ' et super omnem terram [cf. Ps. 46, 2-3] ' ex hac Virgine nasci dignatus est ' et visitare hunc mundum.

Respexit, inquit Maria, Deus humilitatem ancille sue * et ex hoc beatam me dicent omnes generationes. [Luc. 1, 48] Et vere. Beata enim humilitas * que hominibus mortalibus genuit vitam. Vere beata humilitas * que celos innovavit ' mundum purificavit, paradysum aperuit ' et sanctorum animas ab inferis liberavit. Vere beata humilitas ' que porta Celi efficitur * scala paradysi constituitur ' per quam Deus descendit ad terras. Facta est Maria palma virginum ' gloria viduarum + gaudium angelorum * requies animarum.

  • ibid. 1303D et 1305D-1306A.

1 carissimi] add. in marg.