*32- S26 a « Deus omnium »

*32.1 Lectio prima.

[230a]

O dilectissimi fratres ' quis laudes beatissime Virgini digne decantare valeat ? Facta est Maria janua celorum + sublimatio apostolorum ' laus martirum ' jubilatio confessorum ' continentia virginum * norma principum ' justicia regum ' salusque omnium populorum * virtus pugnantium ' palma victorum. Facta est Maria excelsa supra sydera + sanctior super omnes feminas * cujus vita inclita cunctas illustrat ecclesias. Languentes sanat + perditos instaurat * spemque desperatis inspirat. Hec est que pacificat superbos + turbatas mentes illustrat * leta in proficientibus ' fructuosa in penitentibus ' victoriosa in transeuntibus.

• Ps. Alcuinus, h sup. 3, de nativitate BMV, PL 101, c. 1306AB.

*32.2 Lectio secunda.

Virgo virginum sancta + sit super nos pietas tua ' et super afflictos et merentes pro quacumque causa * et super peregrinos clementia tua. Et cum te super ethereos exaltatam aspicis celos + preces nostre humilitatis ne despicias * sed a periculis cunctis libera nos semper, Virgo benedicta. O quam immaculata virginitas + que omnes angelos in celestia regna precellit * et virgineos glorificat choros ! O quam beata mater * que Christum Dominum ' sanctum regem glorie meruit generare ! O quam beati pedes * qui Christum meruerunt sustinere ! O quam felicia ubera * que actorem1 et redemptorem mundi lactaverunt ! O ineffabilis virgo + in cujus continebatur gremio qui regebat universum mundum * a qua sustentabatur gestator orbis !

• ibid. c. 1307AB.

*32.3 Lectio tercia.

Jam nunc, o Virgo beata, exultans per albentia lilia confessorum ' rosasque vernantes martyrum * tu quoque regnas in illo beatissimo felicium regno. Jam nunc intra paradysi amenitatem, cum sanctis regibus incedis + felicique palma immarcescibili cum glorie corona a filio tuo, Domino nostro, glorificaris * juncta autem angelicis choris ' et archangelicis sociata catervis ' in cubiculo regis, filii tui, Domini nostri Jesu Christi, gemmis ac margaritis ornata ' et monilibus decorata persistis. Tibi thronus regius collocatur in aula regia.

Deprecemur ergo tantam reginam et ut ille qui ex ea natus est ' qui mirabiliter creavit hominem mirabiliusque redemit ' solvat nostrorum vincula peccaminum * et ad illam regionem perpetue securitatis et pacis ' nos introducere dignetur Jesus Christus Dominus noster ' qui est benedictus in secula, amen.

• ibid. 1307B et 1308A.