École des chartes » ELEC » Le sanctoral du lectionnaire de l'office dominicain (1254-1256) » [DE BEATA VIRGINE IN SABBATIS] » *12- S6 a « Deus omnium »

*12- S6 a « Deus omnium »

Sabbato sexto.

Idem in eodem. Å .

*12.1 Lectio prima.

Signum magnum apparuit in celo * mulier amicta sole ' et luna sub pedibus ejus. [Apo. 12, 1] Licet de presenti Ecclesia intelligendum prophetice visionis series ipsa demonstret * tamen non inconvenienter Marie videtur tribuendum. Nimirum ea est, que velut alterum solem induit sibi + ut quemadmodum ille super bonos et malos indifferenter oritur ' sic ipsa quoque non discutit merita * sed omnibus sese exorabilem ' omnibus clementissimam prebet. Omnium denique ne(c)cessitates amplissimo quodam miseratur affectu. Nam et defectus omnis sub ea est * et quicquid fragilitatis seu corruptionis est ' excellentissima quadam sublimitate excedit.

  • Bernardus Claraevallensis, Sermo in dominica infra octavam Assumptionis, Opera V (1968), p. 263, l. 22-26 et 264, l. 1-3a.

*12.2 Lectio secunda.

Supergreditur beata virgo creaturas omnes * ut merito sub pedibus ejus luna esse dicatur. Alioquin ' nichil magnum dixisse videbimur * ut sit luna sub pedibus ejus ' quam super omnes angelorum choros ' super Cherubin quoque et Seraphin exaltatam nephas est dubitare.

Mulier, inquit, amicta sole * et luna sub pedibus ejus. Amplectamur Marie vestigia, fratres * et devotissima supplicatione beatis illius pedibus provolvamur + teneamus eam, nec dimittamus ' donec benedixerit nobis * potens est enim. Nempe vellus est medium inter rorem et aream ' mulier inter solem et lunam * mater inter Christum et Ecclesiam constituta.

  • ibid. p. 264, l. 4-7 et p. 265, l. 15-19.

*12.3 Lectio tercia.

Jam te, mater misericordie, per ipsum sincerissime tue mentis affectum ' tuis jacens pedibus provoluta luna ' mediatricem apud Solem justicie constitutam ' devotis supplicationibus interpellat * ut in lumine tuo videat lumen ' et Solis gratiam tuo mereatur obtentu ' quam vere amavit ' et ornavit pre omnibus ' stola glorie induens ' et coronam pulcritudinis ponens in capite tuo. Plena es gratiarum ' plena rore celesti * innixa super dilectum ' deliciis affluens. Ciba hodie pauperes tuos, domina. Ipsi quoque catelli de micis edant + nec solum puero Abrahe ' sed et camelis potum tribuas de supereffluenti ydria tua * quia vere puella es preelecta ' et preparata Altissimi filio ' qui est super omnia benedictus in secula amen. [Rom. 9, 5]

  • ibid. p. 274, l. 11-20.

a Egalement utilisé en 102.2-3, *3.3 et *11.