École des chartes » ELEC » Le sanctoral du lectionnaire de l'office dominicain (1254-1256) » [DE BEATA VIRGINE IN SABBATIS] » *25- S19 a « Deus omnium »

*25- S19 a « Deus omnium »

Sabbato undevicesimo.

Idem in eadem oratione. Å .

*25.1 Lectio prima.

Aula universalis propitiationis ' generalis causa reconciliationis ' vas et templum vite et salutis universorum + nimium contrahimus merita tua ' cum in nobis, homunculis vilibus, singulariter recensemus beneficia tua ' que mundus gaudet amans * et gaudens clamat esse [229a] sua. Tu namque, domina admirabilis singulari1 virginitate ' amabilis salutari fecunditate ' venerabilis inestimabili sanctitate + tu ostendisti mundo Dominum suum ' et Deum suum * quem nesciebat. Tu visibilem exhibuisti mundo creatorem suum * quem prius non videbat. Tu genuisti mundo restauratorem quo perditus indigebat * tu peperisti mundo reconciliatorem ' quem reus non habebat.

  • Anselmus Cantuariensis, Oratio 7, ibid., p. 20, l. 51-59.

*25.2 Lectio secunda.

Per fecunditatem tuam, o domina ' mundus peccator2 est justificatus + damnatus, salvatus * exul, reductus. Partus tuus, domina, mundum captivum redemit + egrum, sanavit * mortuum, resuscitavit. Insidiis et oppressionibus demonum ' tenebris obvolutus mundus subjacebat * sed sole de te orto illuminatus ' eorum et laqueos devitat et vires conculcat. Celum ' sidera ' terra ' flumina ' dies ' nox ' et quecumque humane potestati vel utilitati sunt obnoxia + in amissum decus sese gratulantur, domina, per te quodam modo resuscitata * et nova quadam ineffabili gratia donata. Quasi enim omnia mortua erant * cum, amissa congenita dignitate favendi dominatui vel usui Deum laudantium, ad quod facta erant ' obruebantur oppres[s]ione ' et decolorabantur ab usu3 ydolis servientium ' propter quod facta non erant. Quasi vero eadem resuscitata letantur * cum jam Deum confitentium et dominatu reguntur ' et usu decorantur. Nova autem et ineffabili gratia quasi exultaverunt * cum ipsum creatorem suum ' non solum invisibiliter supra se illa regentem senserunt ' sed etiam visibiliter intra se eisdem utendo ' et ea sanctificantem ipsum viderunt.

  • ibid. p. 20-21, l. 59-74.

*25.3 Lectio tercia.

Sed cur solum loquor, domina, beneficiis tuis plenum esse mundum ? Inferna penetrant * celos superant. Per plenitudinem enim gratie tue, et que in inferno erant se letantur liberata * et que supra mundum sunt ' gaudent se restaurata. Per eundem quippe gloriosum filium gloriose virginitatis tue omnes justi qui obierunt ante vitalem ejus mortem exultant diruptione captivitatis sue * et angeli gratulantur restitutione semirupte civitatis sue. O femina mirabiliter singularis ' et singulariter mirabilis * per quam elementa renovantur ' inferna remediantur ' homines salvantur ' angeli reintegrantur. O femina plena et superplena gratia * de cujus plenitudinis exundantia respersa ' sic revirescit omnis creatura.

  • ibid. p. 21, l. 76-85.

1 singulari] add. super l.
2 peccator] peccato a.c.
3 ab usu] abusu.