A touz ceus qui ces letres verront et orront, je Nicolas de Castenoi chevaliers et madame Agnes ma feme saluz en Jesucrit. Nous fesons a savoir a touz ceus qui sont et qui avenir sont que comme contenz fust entre nous, d une partie, et Religieuse gent le prieur et le couvent de Saint Martin des Chans de Paris de l autre partie, sur ce que nous et Ferri le Juene, mes freres, et sa feme disions et demandions seur une piece de terre qui siet ou terroir de Chastenoi36 par devers Puiseus, joignant de cele partie a la terre Renart le Tainturier, jadis bourgois de Paris, et de l autre partie par desus au jardin Basile de Charni lequel jardin elle tient de nous a une maalle de cens, et au jardin Aveline la Peletiere et, de l une partie d en costé au pré Ferri le Juene et de l autre partie a la terre Ernoul Bridoul, deux garbes de blé pour raison de champart, l une par reson de nostre iretache et l autre par reson d achat d Adam Morree, lequel achat nous aviens fait a Adam Morree et use aviens nous et nos devantiers d avoir et de recevoir les devant dites jarbes par reson de champart en icele piece de terre par lonc tens : laquelle chose devant dite li Religieus nous nioient. Nous, enquise la verité, par le conseil de bonne gent, avons renoncié et renonçons du tout et expresséement a la chose, et au content desus dit, et quitons et avons quitié du tout les garbes desus dites et queque reson et queque droiture nous aviens ou poienz avoir en icele piece de terre sans riens retenir, ne riens des ore en avant n'i reclamerons ne ferons reclamer par nous ne par autrui. Et en tesmoing de ce nous avons seelees ces letres de noz seaus.

Ce fu fait en l an de l'Incarnation mil et ii cens et sessante v, ou mois de juin.