In nomine sanctæ et individuæ Trinitatis, amen. Philippus, Dei gratia, Francorum rex : Noverint universi, præsentes pariter et futuri, quoniam Andreas de Ulmeto ecclesiæ beatæ Mariæ de Valle Sarnaii in elemosinam dedit grangiam de Boillonnello et quicquid ibidem habebat, tam in bosco quam in plano, et pascua et boscum quæ fuerunt Theobaldi Canis, et totum id quod emit a Jocelino, et totam terram de Lavarvilla, et omnia quæ emit apud Fontenetum, tam in terris quam in pratis, præter illud quod dedit Philippo de Ber1 ; et terram de Monteboscheti, et clausum suum de Chesneto, et pressorium et censivam totius illius territorii ; et novem arpennos pratorum apud Roissiacum ; et molendinum fullericum apud Ulmetum, et in mollendinis de Ulmeto molituram eorum liberam ad grangiam de Boillonnello ; et domum suam, sitam apud Corbolium, in claustro Sancti Exuperii. Præterea, cum Andræas, nepos ejus, præfatæ dedisset ecclesiæ, in obitu suo, viginti solidos de redditu percipiendos annuatim in furno suo de Corbolio ; et, cum Robertus, homo de corpore memorati Andrææ de Ulmeto, dedisset sepedictæ ecclesiæ, in elemosinam, domum suam de Corbolio, liberam ab omni consuetudine, et vineas, et vasa sua vinaria, et sex solidos de censu, quos tenebat a monachis Beatæ Mariæ de Campis ad duodecim denarios de censu, ita dico, si eum sine herede mori contingeret, idem Andræas de Ulmeto hæc omnia benigne laudavit et concessit. Nos vero dictæ elemosinæ manum nostram apponentes, hæc omnia intuitu Dei concedimus, salvo alieno jure, et observanda manu capimus ; et ut perpetuam obtineantstabilitatem, præsentem paginam sigilli nostri auctoritate ac regii nominis caractere subter annotato præcipimus confirmari. Actum apud Fontem-Blaaudi, anno incarnati Verbi millesimo centesimo octogesimo quarto, regni nostri anno sexto ; astantibus in palatio nostro quorum nomina supposita sunt et signa. Signum comitis Theobaldi dapiferi nostri. Signum Guidonis buticularii. Signum Mathei camerarii. Signum Radulphi constabularii. Data per manum Hugonis cancellarii.