École des chartes » ELEC » Cartulaires d'Île-de-France » Vaux-de-Cernay » Tome premier (2e partie) 1251-1300 » 1261-1270 » Nov. 1266

" Littere Roberti, dicti Picart, " de medietate omnium mobilium suorum.

  • A Original en parchemin scellé1. — Inv., p. 136, l. 2, nº 8.
  • a Cartulaire de l’abbaye Notre-Dame des Vaux-de-Cernay, de l’ordre de Cîteaux, au diocèse de Paris, éd. Lucien Merlet et Auguste Moutié, Paris, 1857-1858.
D'après a.

Universis presentes litteras visuris, officialis curie Parisiensis, salutem in Domino : Notum facimus quod Robertus le Charron, dictus Picart, de Castris, et Isabellis, ejus uxor, proposito ducti salutari, considerata honestate et vita laudabili in Christo religiosorum virorum fratrum seu monacorum Vallium Sarnaii ac caritate loci ejusdem, sitientes admitti in preces et benefacta ipsorum et ecclesie, ac postulantes sibi cum decesserint fieri debitam in eadem ecclesia sepulturam, spontanei non coacti, voluntarie, ut dicebant, dederunt et concesserunt, in puram et perpetuam elemosinam, ipsis ecclesie et fratribus seu monachis, sine spe seu possibilitate revocandi ulterius, per se vel per alium, in futurum, medietatem omnium mobilium que et quanta habebunt tempore quo decedent ipsi Robertus et Isabellis seu alter eorumdem ; predicentes tamen et protestantes se non posse compelli ab aliquo ad agmentandum seu diminuendum mobilia sua que habent et habituri sunt, set dum matrimonialiter simul vixerunt possunt ea unanimiter pertrattare et dictam donationem seu concessionem nullatenus revocare, nec ipsam habebunt ipsi monachi donec post obitum dictorum R[oberti] et Ysabellis ; set supervivens medietatem dictorum mobilium sic concessam dictis ecclesie et monachis contingentem primitus decedentem tenebit et ex ea, quamdiu vixerit, congaudebit, absque contradiccione, datis prius bonis fidejussoribus a parte mulieris predicte pro medietate sic concessa a dicto Roberto, si ipsum antequam ipsam contingeret decessisse. Licitum est enim cuilibet eorum superviventi, si voluerit, alii conjungere copula maritali. Hec voluerunt et concesserunt iidem R[obertus] et ejus uxor, spontanee, ex certa scientia ; promittentes bona fide quod contra non venient, per se nec per alium, in futurum. Et ad voluntatem et peticionem eorumdem, presentibus sigillum curie Parisiensis duximus apponendum. .


1 Sceau en cire brune, sur double queue de parchemin. Au contre-sceau, une crosse avec deux fleurs de lis. Légende : Fcm. ano. mccliii.