École des chartes » ELEC » Cartulaires d'Île-de-France » Vaux-de-Cernay » Tome second » Première moitié XIVe siècle » 7 feb. 1310, n. s.

De compositione cum abbatia sancti Maglorii Parisiensis super decimis de Aita.

  • B Copie. — Déclaration de 1511, fº 117 rº.
  • a Cartulaire de l’abbaye Notre-Dame des Vaux-de-Cernay, de l’ordre de Cîteaux, au diocèse de Paris, éd. Lucien Merlet et Auguste Moutié, Paris, 1857-1858.
D'après a.

Universis præsentes litteras inspecturis, frater Gerbertus, permissione divina, monasterii sancti Maglorii Parisiensis abbas humilis, totusque ejusdem loci conventus, æternam in Domino salutem : Cum lis sive discordia verteretur inter nos, ex una parte, et religiosos viros abbatem et conventum de Vallibus Sarnaii, ex altera, super eo quod dicebamus nos habere et percipere annuatim in dictorum religiosorum granchia de Aita tres sextarios bladi et totidem avenæ ; insuper dicebamus nos percipere et levare decimas in pluribus terris dictorum religiosorum de Vallibus Sarnaii, quas ipsis propriis manibus colebant et ad dictam granchiam de Ayta pertinentibus ; ipsis in contrarium dicentibus et etiam asserentibus de prædictis omnibus quæ petebamus ipsos esse liberos penitus et immunes, ad solutionem decimarum prædictarum, ratione privilegiorum suorum, non teneri : tandem, propter bonum pacis et amicitiæ quæ inter nos religiosos solet et debet præcipue refulgere, communicato bonorum consilio et inter nos deliberatione præhabita diligenti, et videntes utilitatem nostram et ecclesiæ nostræ, composuimus in hunc modum, videlicet quod nos percipiemus et habebimus annuatim in dicta granchia de Aita, , quinque sextarios et unam minam bladi et totidem avenæ, ad mensuram Montis-Fortis, de illo blado et avena quæ in predictis terris creverint annuatim, tali modo quod de dicta granchia de Aita et omnibus terris quas, tempore confectionis præsentium litterarum, dicti religiosi de Vallibus Sarnaii habent ad dictam granchiam pertinentibus, exceptis tribus arpentis quæ sunt de decima de Marolio, pro prædictis undecim sextariis tam bladi quam avenæ super solutione decimarum erunt de cætero quicti, liberi penitus et immunes. Et si aliquid in locis prædictis tempore futuro dicti religiosi de Vallibus Sarnaii acquirent, in quibus locis nos habemus decimas, ipsi tenebuntur reddere et solvere decimas nobis ibidem consuetas, nonobstante compositione prædicta de novis acquisitis post datam præsentium litterarum. Et ne in posterum lis, contentio seu controversia, ratione prædictarum rerum, iterum renovetur, prædictis religiosis de Vallibus Sarnaii nostras litteras sigillis nostris quibus utimur dedimus sigillatas. Datum et actum .