Universis presentes litteras inspecturis, ego Theobaldus de Piatovillari, miles, salutem in Domino : Notum facio quod cum haberem ex hereditate mea et tanquam meas possiderem quamdam peciam terre arabilis, tria sextaria seminis capientem, sitam apud Crucem Sancti Germani, contiguam chimino Drocensi, ex una parte, et ex altera parte, terre Christiani Benedicti, in feodo Guillelmi de Carnoto, militis, et quamdam aliam peciam terre arabilis, capientem dimidium modium seminis, sitam apud Harevillam, contiguam terre Georgii, dicti Mallart, nunc defuncti, ex una parte, et ex altera parte, terre Garini de Magno-Campo, et quamdam aliam peciam terre arabilis quatuor sextaria seminis capientem, sitam apud Bereherias-la-Meingot, ante domum hominis dicti Flori, et quartam partem nemorum de Brocin, cum fundo seu solo suo, que quidem nemora sita sunt in feodo Raginaldi Brocin, militis ; item cum haberem et perciperem et consuetus essem percipere et habere, jure hereditario, de annuo redditu, in crastino festi Omnium Sanctorum, super herbergamento Gaufridi, dicti Parvi, sito apud Bercherias predictas, octo solidos censuales et quamdam gallinam ; item cum haberem et possiderem, ex dicta hereditate mea, quoddam feodum quod quedam mulier, que vocatur domina Menendis de Forneaus, a me tenet et possidet ad feodum et homagium ; item cum haberem et perciperem et consuetus essem habere et percipere, jure hereditario, annuatim, in festo sancti Remigii, super herbergamentum Droconis, dicti Vicini, sito apud dictas Bercherias, duodecim denarios censuales ; et super herbergamento Bone-Femine, sito apud dictas Bercherias, unam pictavinam ; et super herbergamento Simonis, dicti Hermant, apud dictas Bercherias sito, quamdam aliam pictavinam ; et super herbergamento Stephani, dicti Gachonis, apud dictas Bercherias sito, unum obolum ; et super herbergamento Hodoini, carnificis, apud dictas Bercherias sito, unum denarium ; et super herbergamento Stephani Normanni, apud dictas Bercherias sito, duos denarios censaales : Ego predictus Theobaldus de Piatovillari, miles, res predictas omnes et singulas et quicquid juris in eis omnibus et singulis habebam et habere poteram, vendidi et nomine venditionis concessi, ad usus et consuetudines patrie, religiosis viris abbati et conventui Vallium Sarnai, pro quinquaginta quinque libris carnotensibus, quas ego confiteor me recepisse et habuisse a dictis religiosis in pecunia numerata, et de quibus me teneo pro pagato ab eisdem ; renuncians, etc................. Et ut hec robur in perpetuum obtineant firmitatis, ego predictus Theobaldus dictis religiosis dedi presentes litteras sigilli mei munimine roboratas. Datum anno Domini millesimo ducentesimo quinquagesimo quinto, mense decembri.