École des chartes » ELEC » Cartulaires d'Île-de-France » Vaux-de-Cernay » Tome premier (2e partie) 1251-1300 » 1271-1280 » Mart. 1275, n. s.

" Compositio facta de pascuis nemorum de Bollonnel. "

  • A Original en parchemin, scellé1. — Inv., p. 122, l. 1, nº 12.
  • a Cartulaire de l’abbaye Notre-Dame des Vaux-de-Cernay, de l’ordre de Cîteaux, au diocèse de Paris, éd. Lucien Merlet et Auguste Moutié, Paris, 1857-1858.
D'après a.

A touz ceus qui ces présentes lettres verront, Reyan de la Porte, Jehan le Minagier et Jehan Cocos, prévoz de Courbueil, salut : Sachent tuit que, an notre présence establiz, frère Thomas Danyeel, procureur, ou non de l'abé et dou couvant des Vax de Sarnoi, d'une part, ayant procuracion dou devant dit abé et dou couvant, seellée de leur seel, Symon le Fiévé, Guillaume le Peletier, au dui de Seint-Fergel ; Guillaume Morin, Richart Brunel, au dui d'Ausonne ; Thomas Thirant, Guiart Billart, au dui de Tilli, de l'autre part, procureurs des dictes trois viles, et ayant procuracion général seellée dou seel de la prévosté de Gourbueil pour le commun desdittes trois viles ; et estoit certain discord entre ces dittes parties, c'est asavoir que li dit sis procureurs, pour le commun desdittes viles, demandoient à avoir paturages és bois audit abé et au couvant de Boullongnel à leur bestes1, c'est à savoir à beuf, à vache, à thorel et à veel tant seulemant, sanz nule autre beste : an la fin, par acordance de bone pes, les dittes parties se sont acordées d'un acort pessible ansamble sanz nul décort, et ont pes fete an ceste manière qui s'ansuit, c'est asavoir que toutes les personnes desdites trois viles metent et puissent metre ou fere metre les devant dittes bestes és devanz du bois de Bouillonnel au chief de sis anées acomplies toutes hors, et s'il avenoit que li diz abés ou li couvanz ou leur coumandemant coppassent ou feissent copper par eus ne par autres des devanz diz bois dedanz ce terme de sis anées desus dittes acomplies, que les dittes personnes desdittes viles pourroient metre ou fere metre lesdittes bestes desus nonmées és diz coperz, sanz contredit, sanz amande et sanz forfet juques au premier bourjon que l'an pourroit apercevoir, et se lesdites bestes i estoient trouvées puis le premier bourjon, deffeansse doudit abé et dou couvant ou de leur certein coumandemant avant fete, que il seroient en l'amande audit abé et au couvant par la coutume dou chastel. Et de ceste acordance sont mis hors par l'acort desdittes parties li aubene et li chamberier, s'il n'ont esritages és dittes viles. Et quant à ce tenir fermemant et acomplir, lesditte parties se sont obligié chascune partie vers l'autre, sus poine de vint livres de Paris, an tele maniere que qui iroit à l'ancontre de ce desus dit, que la partie pourroit nautef l'autre de vint livres de parisis ; et quant à toutes ces convenances desus dittes, ansamble et chascune par soi, tenir fermemant et à acomplir li dit procureur, pour les personnes desdittes viles comme procureur, ont obligié et som mis eus et leur hoirs à touz leur biens meubles et non meubles, présenz et à venir, où qu'il soient, ajoutissant à nous ou à nos successeurs ; et ont renoncié li dit procureur à toutes demandes et à toutes accions et à toutes indulgences de croiz otrées et à otréer, prisses et à prandre, et à toutes barres, deffanses ou excepcions dilatoires et péremptoires, et à toutes autres aydes de droit, de lei, de canon et de coutume, qui à toutes ces convenances leur poinst eidier, et audit abé et au couvant nuire. Et au tesmoing de ce, nous avons mis an ces lettres le seel de la prévosté de Courbueil. Et ce fu fet an l'an de l'Incarnation de Nostre Segneur mil et deus cenz sessante et quatorze, ou mois de mars.


1 Voir nos CII, CCCXCII, DCXXXI et DCCXVI, p. 221, 359, 590 et 672.
1 Sceau en cire verte, décrit plus loin.