École des chartes » ELEC » Cartulaires d'Île-de-France » Vaux-de-Cernay » Tome premier (2e partie) 1251-1300 » 1281-1290 » 26 jul. 1278

" Littere Thome Estourmi et uxoris ejus, de composicione facta inter nos et ipsos de Cauda-de-Hez. "

  • A Original en parchemin scellé1. — Inv., p. 77, l. 6, nº 8.
  • a Cartulaire de l’abbaye Notre-Dame des Vaux-de-Cernay, de l’ordre de Cîteaux, au diocèse de Paris, éd. Lucien Merlet et Auguste Moutié, Paris, 1857-1858.
D'après a.

Universis presentes litteras inspecturis, Thomas, dictus Estormi, de Gaillone, et ego Aelicia, uxor dicti Thome, quondam relicta Radulphi Latire, salutem in Domino : Noverit universitas vestra quod cum contentio seu discordia mota fuisset inter nos, predictum Thomam et Aeliciam predictam, ex una parte, et religiosos viros abbatem et conventum Vallium Sarnaii, ex altera, super captione quorumdam namiorum seu pignorum que capi fecimus, nos predicti Thomas et Aelicia, in granchia dictorum religiosorum, sita juxta Caudam-d'Aez, in Wlgasino Normannie, cujus granchie dominium capitale ad nos predictos Thomam et Aeliciam, et ratione solius Aelicie supradicte, dignoscitur pertinere ; que quidem namia seu pignora antedicta capta fuerant, ea occasione et causa quod dicebamus dictos religiosos, ratione dicte granchie, nobis teneri, ratione dicti capitalis dominii, ad auxilium imperciendum ad filium vel filiam maritandum vel etiam maritandam cum res exigeret, et in aliis duobus casibus, juxta consuetudinem Normannie, debitis et consuetis. Et predicti religiosi econtra assererent et constanter affirmarent se esse immunes, liberos et quietos a predictis consuetudinibus, serviciis et auxiliis et omnibus aliis exactionibus que possent exigi vel deberi a dicta granchia et pertinenciis suis, exceptis decem et octo denariis parisiensibus annui census nobis debitis ab eisdem religiosis et quos confitebantur nobis deberi, ratione dicte granchie et rerum ad ipsam pertinentium, annuatim, , in cujus solutione, si quandoque cessari contigeret, confitebantur dicti religiosi dictam Aeliciam et heredes suos namia capere posse in feodo predicto et non aliqua alia ratione vel causa. Tandem inter nos diucius altercato et variis tractatibus habitis super contentione vel discordia antedicta, tandem, intervenientibus communibus amicis, dicta contencio seu discordia in hunc modum finaliter conquievit, quod ego dicta Aelicia, de auctoritate dicti Thome, mariti mei, ac etiam de voluntate et assensu ejusdem Thome et omnium heredum meorum, necnon et intuitu pietatis divine, et pro salute animarum nostrarum et antecessorum nostrorum, remisi, quitavi et penitus dimisi pure, libere ac simpliciter et spontanea voluntate, prefatis religiosis quicquid juris habebam vel habere poteram in granchia antedicta vel in pertinenciis suis prefatis religiosis et eorum successoribus universis, exceptis tamen et retentis michi prefate Aelicie et heredibus meis predictis decem et octo denarios annui census et jure michi competente in eisdem ; ita tamen quod si cessatum fuerit in solutione dicti redditus quandocumque, nulla namia vel pignora capi poterunt, ratione dicti redditus, in dicta granchia vel infra portas seu clausuram ejusdem, sed tantum in terris sitis ad campos ad dictam granchiam pertinentibus cum in eis aliquid contigerit inveniri. Preterea ego dicta Aelicia, de auctoritate dicti Thome, mariti mei, et voluntate ac assensu ipsius et heredum meorum, promisi, dedi et concessi dictis religiosis liberam facultatem et potestatem acquirendi in feodo nostro de Tylliaco, post confectionem presentium litterarum, usque ad sex acras terre, sine reclamatione vel impedimento nostri vel heredum nostrorum, salvo tamen jure nostro tam in ventis ad nos ratione dominii capitalis pertinentibus quam in redditibus annuis debitis et consuetis ratione earumdem ; pro quibus eciam nichil aliud, nisi dictum redditum annuum debitum et consuetum vel captionem pignorum, si in eis cessatum et pro emenda fuerit, retinemus. Nos vero predicti Thomas et Aelicia, premissa omnia laudantes et approbantes, juravimus ad sancta Dei euvangelia et fidem eciam super hoc prestitimus corporalem uterque nostrum quod contra premissa vel aliquid premissorum nunquam veniemus in futurum, verbo vel opere vel ullo alio modo, per nos vel per interpositas personas ; set premissa omnia inviolabiliter observabimus et super ipsis dictos religiosos conservabimus indempnes, salvo tamen dicto redditu eo modo quo predictum est. Et in horum omnium testimonium, robur et perpetuam firmitatem, ego dicta Aelicia, de auctoritate dicti mariti mei, presentibus litteris sigillum meum apposui. Et ego dictus Thomas omnia premissa auctorizans et ex causis predictis laudans et approbans, sigillum meum, una cum sigillo dicte uxoris mee, duxi similiter presentibus apponendum. . Testibus hiis : magistro Ade Anglico ; magistro Ricardo Pele ; Roberto, scriptore, clericis ; Radulpho Theroude ; Guiardo le Charpentier ; Roberto l'Espicier, et pluribus aliis.


1 Ce sceau sera décrit à la charte suivante.