École des chartes » ELEC » Cartulaires d'Île-de-France » Vaux-de-Cernay » Tome premier (2e partie) 1251-1300 » 1271-1280 » Aug. 1275

De confirmatione triginta arpentorum nemoris, ex dono Johannis de Bries.

  • B Copie. — Déclaration de 1511, fº 232 vº.
  • a Cartulaire de l’abbaye Notre-Dame des Vaux-de-Cernay, de l’ordre de Cîteaux, au diocèse de Paris, éd. Lucien Merlet et Auguste Moutié, Paris, 1857-1858.
D'après a.

Universis præsentes litteras inspecturis, Robertus de Orphino, armiger, Nicolaus, dictus Corme, armiger, de Orphino, et Guido de Rupeforti, miles, salutem in Domino : Noverint universi quod nos donationem illam quam Johannes de Bries, miles, et Avelina, uxor ejus, fecerunt religiosis viris abbati et conventui Vallium Sarnaii de triginta arpentis nemoris et amplius in uno tenente et proprietate fundi dicti nemoris, moventibus ex hæreditate dicti Johannis, sitis sub Monte Falcone, juxta nemora dictorum religiosorum et fontem Sancti Johannis, volumus, laudamus et concedimus, tanquam domini feodi nemoris supradicti. Volumus etiam et concedimus quod dicti religiosi dictum nemus et fundum ipsius nemoris teneant et possideant in manu mortua, sine coactione vendendi aut extra manum suam ponendi, libere et pacifice in futurum, nichil in prædictis juris vel dominii retinentes. In cujus rei testimonium et munimen, præsentes litteras dictis religiosis sigillorum nostrorum munimine dedimus roboratas. .