École des chartes » ELEC » Cartulaires d'Île-de-France » Vaux-de-Cernay » Tome premier 1118-1250 » Première moitié XIIIe siècle » 16 mart. 1233, n. s

De duabus domibus in parrochia sancti Germani Autissiodorensis, Parisius.

  • A Original en parchemin scellé. — Inv., p. 52, l. A, nº 16.
  • a Cartulaire de l’abbaye Notre-Dame des Vaux-de-Cernay, de l’ordre de Cîteaux, au diocèse de Paris, éd. Lucien Merlet et Auguste Moutié, Paris, 1857-1858.
D'après a.

Guillelmus, divina permissione, Parisiensis ecclesie minister indignus, omnibus presentes litteras inspecturis, salutem in Domino : Notum facimus quod, constituti in presentia nostra, Thiboudus de Gravia, civis Parisiensis, ex una parte, et religiosi viri abbas Vallium Sarnaii et frater Petrus de Buxeria, procurator conventus ejusdem loci, ex altera, mediantibus bonis viris, quitaverunt se invicem de venditione quam abbas et conventus predicti fecerant prefato Thiboudo de censu, quem habebant, Parisius, in duabus domibus sitis in parrochia sancti Germani Autisiodorensis Parisiensis, in feodo nostro, pro ducentis et quadraginta libris parisiensibus, ita quod dictus Thiboudus dictum censum reddidit in manu abbatis, et de dicta pecunia tenuit se pro pagato ; sicque fuit tota venditio quantum ad ipsos revocata. Et nos, ad quem spectat terre dominium, circa hoc nostrum attendentes incommodum, nullo modo voluimus sustinere ut id quod in dominio nostro de manu mortua, dictorum religiosorum voluntate, fuerat revocatum, ad eamdem rediret in nostrum prejudicium et gravamen. Et propter hoc cum ad istud obtinendum a nobis, videlicet ut predictas domos in manu mortua possiderent, precibus quibus poterant instarent, eos omnino reppulimus, omnem spem eisdem super hoc precidentes, affirmantes eisdem quod ad hoc inutiliter laborarent, quia nullatenus istud sustineremus, neque capitulum Parisiense, sine cujus assensu ista alienatio non potest fieri etiam si vellemus. Hinc est quod eis injunximus, sub amissione rerum earumdem, ut infra octo dies extra manum suam ponerent dictas domos, precipientes preposito nostro ut eas saisitas in manu nostra teneret, donec eas prefati abbas et conventus extra manum suam posuissent. In cujus rei memoriam et testimonium, presentes litteras sigilli nostri munimine decrevimus roborari. Actum .