École des chartes » ELEC » Cartulaires d'Île-de-France » Vaux-de-Cernay » Tome premier (2e partie) 1251-1300 » 1281-1290 » Jul. 1282

" Littere Johannis de Boulai-Tyerri, armigeri, de XIII sextariis bladi et tribus annone. "

  • A Original en parchemin scellé2. — Inv., p. 134, l. 1, nº 12.
  • a Cartulaire de l’abbaye Notre-Dame des Vaux-de-Cernay, de l’ordre de Cîteaux, au diocèse de Paris, éd. Lucien Merlet et Auguste Moutié, Paris, 1857-1858.
D'après a.

A touz ceus qui verront ces présentes lestres, Guillaume de Condé, prévost de Nougent-le-Roi, saluz en Nostre Seigneur : Sachent tuit présenz et à venir que Johan du Bouloy-Tierri, escuier, fiz et hoirs de Jaques, dit Petit-Moine, jadis escuier, requenut que mon seigneur Pierres, prestre et curé de Cressoy-jouste-Houdenc, avoit tenu et pourseu, comme son propre héritage et son propre demoine, ou tens que ledit Jaques vivoit, lequel estoit père de celui Johan, et ou tens de ses devanciers, nuef setiere de grain, c'est à savoir cinc de blé et quatre de avoine ; et les prenoit et recevoit surs la merie espécialment et surs les biens d'icelle, qui estoient mis et aportez en la granche d'icelui Jaques, jadis escuier, et surs touz les autres biens, se iceus ne povait soufire, mis en celle dite granche de lui et de ses devanciers ; et leur en fesoit li diz monseigneur Pierres, prestre, redevance de quatre deniers et maaille tournois de pur cens, le jor de la feste saint Remi ; lequel blé et laquele avoine ledit Jehan du Bouloi-Tierri, escuier, counut que li diz mon seigneur Pierres, prestre, l'avoit donné et otroié à touz jorz pardurablement, sanz espérance de rapeler, dounaison sollempnel feste entre vis, à homes religieus, à l'abbé et au couvent des Vaus de Sarnoy, pour le remède et le salu de s'ame et pour son enniversaire fete en ladite abaie. Et coume icelle dounaison et icelle octreance desurs noumées de cez nuef setiers devant diz fussent enpechiez et troublez dudit Jaques, jadis escuier ou tens qu'il vivoit, et du devant dit Johan, escuier, au religieus desurs noumez, pacefié fu et ordené, du conseil de bone genz, pardevant nous, que li abbés et li couvenz du devant dit leu ou leur coumandement prendroient et poursuiroient à touzjorz, comme leur propre héritage et leur propre demoine, en la granche dudit Johan, escuier, laquele li est devenue par la raison de la succession de ses devanciers, et espécialement surs les biens de la merie, et surs ses biens muebles se iceus ne povaist soufire, lesquex seroient aportez et mis en ladite granche, trois setiere de blé et trois seliere de avoine à la value de champart, pesiblement et franchement, sanz coaction de vendre ne de mestre hors de leur main à trois deniers tournois de chier-cens poiez et renduz, desdiz religieus ou de leur coumandement, le jor de la feste saint Remi, audit Johan, escuier, ou à ses hoirs ; et les garandira audiz religieus et à leur successeurs à ses propres couz envers touz. Et se li abbés et li couvenz ou leur coumandement ne poiait ledit cens ou jor de ceste dicte feste, il seroient tenuz audit Johan et à ses hoirs en sept souz et demi de tournois pour l'amende ; et se les trois setiere de blé et les trois d'avoine n'estoient poiez le jor de la feste desurs dite, li diz Johan, escuier, et ses hoirs, seroient tenuz audiz religieus en l'amende qui est desurs escrite. Et se il avenoit par aucune fortune que celle dite granche [ne feust] gastée, harse, cheue ne destruite, ne que les biens de la merie ne autres n'i fussent mis ne aportez dudit Johan ne [de ses hoirs, les] diz religieus suivraient et iraient là où les biens muebles cressanz en la merie ou en l'éritage dudit Johan [quelque il fust], et pourroient prendre et lever lesdiz trois setiere de blé et les trois de avoine en quiconques leu lesdiz [biens] fussent portez ne translatez. Et quant à ce tenir ferm et estable, lediz Johan, escuier, a obligié pardevant nous soi et ses biens et ses hoirs, et les biens de ses hoirs, et les a relenquiz touz obligiez ; en renunçant, etc.............

Ou tesmoig de laquele chose, nous avons seellées cez présentes lestres, à la requeste des parties, du seel de la prévosté de Nougent-le-Roi, et du seel dudit Johan, escuier, et bailliés audiz religieus. Ce fu fest en l'an de grace mil deus cenz quatre vinz et deus, ou mois de jugnet1.


1 Cette pièce fut vidimée en décembre 1295 par l'official de Chartres. (Inv., p. 134, l. 1, nº 12 bis.)
2 Sceau en cire brune, sur double queue de parchemin. Un faucon étreignant dans ses serres, ornées d'un long lambel, une perdrix à laquelle il donne la mort à coups de bec. Légende : S. Johan le Moine esc..... (Gravé.) — Nous allons retrouver la même scène de chasse, nos DCCCXXXVIII et DCCCXXXIX, sur le sceau de Jean de Mandreuse, écuyer. Ces deux exemples, appuyés d'un grand nombre d'autres, prouvent la justesse de l'observation faite par M. Hucher, du Mans, dans sa Sigillographie du Maine, p. 17, que ce type de faucon appartient particulièrement aux sceaux des écuyers. A. M.