Universis presentes litteras inspecturis, ego Ernaudus de Boucleinvalle, armiger, salutem in Domino : Noveritis quod cum Theobaldus de Piatovillari, miles, partem haberet mecum in bosco de Broncin et etiam in plano dicti bosci, et partem eidem militi fecerim de predictis bosco et plano, et dictus miles illam partem quam eidem militi feci, bonnavi et deliberavi, tamquam heres dicti bosci, vendiderit religiosis viris abbati et conventui Vallium Sarnaii ; ego prefatus Ernaudus venditionem predictam ratam habens et gratam, volo, concedo pariter et laudo quod predicti abbas et conventus totam partem illam dictorum bosci et plani a dicto milite, ut dictum est, venditam teneant tanquam suam, et absque mei vel meorum contradictione, calumpnia seu reclamatione, juste, pacifice, libere et quiete, et in manu mortua possideant in futurum. Hanc autem premissorum bosci et plani venditionem dictis religiosis a dicto milite factam, ego prenominatus armiger, fide mea media, promisi me et meos dictis religiosis, contra heredes defuncti Guerini de Bercheriis et Philipotum de Dumo et contra omnes alios, fideliter im perpetuum garandire. Ad cujusmodi garandiam dictis religiosis contra omnes expressos superius et super premissis fideliter im perpetuum faciendis, me et meos presentibus meis litteris obligavi specialiter et expresse ; renuncians, etc................ In cujus rei testimonium et munimen, ego predictus Ernaudus, heres dictorum bosci et plani, presentes litteras sigillo meo dictis religiosis tradidi sigillatas. Datum anno Domini Mº CCº LXº secundo, die sabbati in octabis Epyphanie Domini.