École des chartes » ELEC » Cartulaires d'Île-de-France » Vaux-de-Cernay » Tome premier (2e partie) 1251-1300 » 1281-1290 » Mai. 1279

" Carta nemoris de Boillonel, de compositione inter nos et communitates de Plesseio et de Monceaux. "

  • A Original en parchemin scellé1 — Inv., p. 122, l. 1, nº 13.
  • a Cartulaire de l’abbaye Notre-Dame des Vaux-de-Cernay, de l’ordre de Cîteaux, au diocèse de Paris, éd. Lucien Merlet et Auguste Moutié, Paris, 1857-1858.
D'après a.

A touz ceus qui ces présentes lestres verront et orrunt, Johan Cocors, prévost de Courbueil, et Johan le Mesnagier, garde du seel de la prévosté de ce devant dit leu, saluz en Nostre Seigneur : Sachent tuit com contenz ait esté meu ja pieça en l'assise de Courbueil, entre religieus homes l'abbé et le couvent des Vaux de Sarnoy, d'une partie, et les communautez des genz, c'est assavoir du Plessie et de Monciaux, de l'autre, surs ce que les devant dites communautez demandoient et requéroient avoir pasturages à leur bestes, à la cinquième fueille passée, és bois des devant diz religieus, abbé et couvent, assis à Bouillonel, en la chastelerie de Courbueil1 ; emprès mout altercations de paroles d'une partie et d'autre dites et proposées, et pledié mout longuement et en assise pardevant Johan le Saunier, qui lors estoit baillif en ce tens : conneue chose soit à touz présenz et avenir que du contenz devant dit pacefié fu et ordené entre les parties devant dites, présentes en jugement pardevant nous et en assise les devant dites communautez pour eus et frère Guerri, procureur du devant dit abbé et couvent, en ceste manière qui s'ensuit emprès : c'est asavoir que les devant dites communautez ne merront leur bestes, ne par eus ne par autres, és devant diz bois, jeques à tant que les bois devant diz aront sept ans passez et acompliz, l'age passé et acompli des devant diz bois par le serement des devant dites communautez prouvé, il pourront amener leur bestes és devant diz bois, c'est asavoir bues, vaches, toriaux et veaux tant seulement ; et pour chascune beste devant dites, il rendront au devant dit abbé et couvent ou à leur coumandement, demorant à Bouillonel, pour chauscune vache, buef, torel et veel deus deniers tournois, escepté le veel s'il alete, le , quant il i enterront, et ensivant chascun an, tant com il viendront, en rendant les deus deniers desurs diz. De rechief il fu ordené entre les parties devant dites, par acort, en jugement et en assise, que se les devant diz bois ainz l'age de sept anz fussent coupez par les religieus devant diz ne par autre, les bestes devant dites i pouroient venir et entrer par la redevance poiant, si com il est dit desurs ; escepté que se il avenoit que les devant diz abbé et couvent ou leur coumandement, des devant diz bois coupoient un arpent, ou deus, ou trois, ou quatre, ou cinc, ou sis, pour leur usaige, que les communautez desurs noumées n'en peussent rien demander ne nulles bestes amener jeques au termes desurs noumez. Et que ce soit ferme et estable, à la requeste des parties, nous avons cez présentes lestres seellées du seel de la chastelerie de Corbueil. Ce fu fet en l'an de l'Incarnation Nostre Seigneur mil deus cenz sessante et dis nuef, ù moys de moy.


1 Voir la charte nº DCCXVI, p. 672, et la note jointe à cette pièce.
1 Débris d'un sceau rond, en cire brune, sur double queue de parchemin. Une fleur de lis et ce fragment de légende : ........ de Corb....... Au contre-sceau, la même fleur de lis, et pour légende : ..... cas preposit. de Co....