École des chartes » ELEC » Cartulaires d'Île-de-France » Vaux-de-Cernay » Tome premier 1118-1250 » Première moitié XIIIe siècle » 27 oct. 1249

" C. Girardi, archidiaconi Parisiensis, de vinea quam nobis dedit Galterius de Booth. "

  • A Original en parchemin. — Inv., p. 131, l. 2, nº 11.
  • a Cartulaire de l’abbaye Notre-Dame des Vaux-de-Cernay, de l’ordre de Cîteaux, au diocèse de Paris, éd. Lucien Merlet et Auguste Moutié, Paris, 1857-1858.
D'après a.

Universis presentes litteras inspecturis, officialis G[irardi], ecclesie Parisiensis archidiaconi, salutem in Domino : Notum facimus quod Odelina de Bovouel, uxor Aconis de Bovoul, recognovit quod defunctus Galterius de Bovoul, presbiter quondam, dum vivebat, dedit et concessit in elemosinam abbati et conventui Vallium Sarnaii, quoddam arpentum vinee quod idem presbiter habebat in colle de Genserroi, in censiva Philippi de Cantu-Galli et Philipi, dicti Chaurum, ut dicebat ; quam donacionem dicta Odelina coram nobis volens et acceptens quitavit ex nunc im perpetuum dictis abbati et conventui, si quid juris et dominii habebat vel habere poterat quoquo modo in predicta vinea ; et promisit dicta Odelina, etc............... Promisit etiam, sub prestita fide, dicta mulier quod si dictus Acco, de partibus transmarinis in quas proficiscendi iter arripuit, ut dicitur, in quo itinere idem Ago dicitur decessisse, redierit, et ipsum Agonem vel alium, racione ipsius Agonis vel dicte Odeline, impetere vel molestare contigerit eosdem abbatem et conventum, ipsa quatuor libras parisienses quas pro quitatione hujusmodirecepit reddet dictis abbati et conventui. Et de hac summa pecunie sic reddenda, dominus Johannes, capellanus capelle domini de Caprosia, se plegium constituit coram nobis, fide data erga dictos abbatem et conventum pro muliere predicta. .