École des chartes » ELEC » Cartulaires d'Île-de-France » Vaux-de-Cernay » Tome premier 1118-1250 » Première moitié XIIIe siècle » Jun. 1246

" Officialis Parisiensis, de pillario ecclesie Sancti Nonni facto in granchia nostra per voluntatem nostram. "

  • A Original en parchemin scellé. — Inv., p. 33, l. 2, nº 1
  • a Cartulaire de l’abbaye Notre-Dame des Vaux-de-Cernay, de l’ordre de Cîteaux, au diocèse de Paris, éd. Lucien Merlet et Auguste Moutié, Paris, 1857-1858.
D'après a.

Omnibus presentes litteras inspecturis, officialis curie Parisiensis, salutem in Domino : Notum facimus quod Isembardus, presbiter curatus Sancti Nonni, Guillelmus de Seren, Theobaldus, dictus Heloysis, et Aubertus, dictus Harent, parrochiani ejusdem ecclesie, asseruerunt et recognoverunt quod religiosi viri abbas et conventus Vallium Sarnaii habebant quamdam granchiam contiguam eidem ecclesie ; in qua granchia eadem ecclesia et ejusdem ville parrochiani nullum jus, nullam servitutem seu redibitionem poterant aliquo modo reclamare, ut dicebant presbiter et parrochiani superius nominati. Item recognoverunt prefati presbiter et parrochiani, nomine ipsius ecclesie et parrochianorum ipsius ville, ut dicebant, quod dicti abbas et conventus, de eorum mera gratia, dederant et concesserant eidem ecclesie terram in dicta granchia ad construendum quendam pillarium, ad opus ipsius ecclesie ; ita quod,eodem pillario constituto, predicti parrochiani eandem granchiam, si in aliquo demolita fuerit vel in muris vel in coopertura, sumptibus eorum reficient, et dictum pillarium preparabunt ita in stillicidiis et aliis necessariis quod per guttum aque eidem granchie vel rebus existentibus in eadem nullum nocumentum sive prejudicium generetur ; et si in hoc dieti abbas et conventus in posterum dampna incurrerint, promiserunt presbiter et parrochiani superius nominati, et ad hoc se obligaverunt, tanquam principales debitores, quod eadem dampna reddent abbati et conventui memoratis. Item confessi fuerunt presbiter et parrochiani predicti quod si ipsi abbas et conventus dictam granchiam altius quam modo est, erigere voluerint, hoc poterunt pro sua voluntate ; et nichilominus presbiter et parrochiani prenominati stillicidia dicti pillarii sumptibus parrochianorum dicte ville, ut dicebant, tenebuntur reparare et conservare in tali statu quod ex hoc nullum prejudicium eidem granchie et bonis in eadem existentibus generetur. Recognoverunt etiam presbiter et parrochiani predicti quod in fundo ipsius granchie nichil juris poterunt reclamare eadem ecclesia et ejus parrochiani, ut dicebant, preter situm pillarii supradicti. Hec omnia et singula presbiter et parrochiani predicti, nomine suo et nomine omnium aliorum parrochianorum, ut dicebant, confessi fuerunt coram nobis, asserentes se super hoc ab aliis parrochianis habere mandatum ; et promiserunt prefate persone et sub pena quadraginta librarum parisiensium quod omnes parrochiani ejusdem ville predicta rata habebunt et quod contra non venient in futurum, et ad dictam penam solvendam, si commissa fuerit, se suosque heredes obligaverunt coram nobis, quilibet in solidum et per fidem. .