École des chartes » ELEC » Cartulaires d'Île-de-France » Vaux-de-Cernay » Tome premier (2e partie) 1251-1300 » 1261-1270 » Mart. 1268, n. s.

" Diffinitiva renunciatio de molendino de Buisom. "

  • A Original en parchemin scellé. — lnv., p. 2, l. 2, nº 4.
  • a Cartulaire de l’abbaye Notre-Dame des Vaux-de-Cernay, de l’ordre de Cîteaux, au diocèse de Paris, éd. Lucien Merlet et Auguste Moutié, Paris, 1857-1858.
D'après a.

In nomine Patris, et Filii, et Spiritus Sancti, amen : Coram nobis, officiali Parisiensi, ediderunt religiosi viri, abbas et conventus Vallium Sarnay, contra dominum Petrum de Breteigniaco, militem, auctoritate ordinaria, suum conventionalem libellum, cujus tenor talis est :

Dicunt in jure coram vobis, domine judex, abbas et conventus Vallium Sarnay, contra Petrum de Breteigniaco, militem, et liberos defuncti Philippi de Aurenvilla, militis, in ballo et mainburnia ipsius militis existentes, quod cum defunctus Philippus de Bussiaco, armiger, in suo testamento legaverit in sua ultima voluntate, ob remedium anime sue, in puram et perpetuam elemosinam, eisdem religiosis dimidium modium bladi, percipiendum annuatim ab eisdem in molendino ipsius defuncti quod habebat apud Buisson1 ; quod bladum iidem religiosi perceperant et habuerant a tempore citra mortis prius defuncti Philippi, pacifice et quiete usque nunc, dictus miles, nomine suo et dictorum liberorum succedentium ipsi defuncto et in bonis ipsius, quantum ad molendinum predictum, tanquam heredes proximiores, impedit et molestat dictos religiosos super perceptione dicti dimidii modii bladi, et se opponit injuste et in prejudicium ipsorum religiosorum, dampnum et gravamen, quin dicti religiosi dictum bladum habeant et percipiant, prohibendo eisdem ne dictum molendinum intrent pro blado predicto capiendo, et inhibendo munerio dicti molendini, tenenti dictum molendinum a dicto milite, nomine dictorum liberorum, ne dictum bladum solvat et liberet eisdem religiosis, sic dictam elemosinam et legatum dicti defuncti impediendo. Quare petunt dicti religiosi ipsum militem, nomine dictorum liberorum, sententialiter condemnari et compelli ad desistendum ab impedimento, molestatione et oppositione predictis. Hec dicunt et petunt, salvo sibi juris beneficio in omnibus ; protestantes de probando quod sibi sufficiat de premissis, et de expensis factis et faciendis in lite sibi refundendis.

Deinde prefatus miles contra predictos abbatem et conventum, reconveniendo eosdem, libellum suum edidit coram nobis, cujus tenor talis est :

Dicit in jure coram vobis ; domine judex, Petrus de Bretigniaco, miles, tutor legitimus seu curator filiorum quondam defuncti Philippi de Eurevilla, militis, contra abbatem et conventum Vallis Sarnay, eosdem reconveniendo, quod cum filii dicti defuncti succedant et sint heredes ejusdem, dicti abbas et conventus ceperunt seu capi fecerunt, a tempore mortis dicti defuncti, in quodam molendino sito apud Buisson, quod fuit dicti defuncti, usque ad duos modios bladi et dimidium, hereditatem dicti defuncti expilando, antequam ab ipsis seu aliquo eorum nomine adita esset hereditas, seu antequam res hereditarie ab eisdem seu nomine ipsorum essent possesse. Quare petit dictus Petrus, nomine tutoris dictorum filiorum, dictos abbatem et conventum condempnari et condempnatos compelli ad reddendum eidem predictos duos modios bladi et dimidium. Et hec dicit et petit, salvo sibi juris beneficio in omnibus, protestans de probando quod sibi sufficiat de premissis et de expensis suis factis et faciendis in lite sibi loco et tempore refundendis.

Lite igitur super premissis legittime contestata, jurato de calumpnia, tandem cum predicte partes in nos compromisissent super omnibus et singulis supradictis, ita quod ipse partes quicquid super premissis pace vel judicio ordinaremus inviolabiliter observarent, sub certa pena in dicto compromisso adjecta, ac voluissent quod nos, secundum attestationes testium quos utraque pars ad suam intentionem fundandam duceret producendos, judicare possemus, prout in litteris curie Parisiensis continetur, testibus ex parte dictorum abbatis et conventus productis ad suam intentionem fundandam, juratis ac de mandato nostro diligenter examinatis, coramque attestationibus publicatis, visis et diligenter inspectis, actis habitis inter ipsas partes coram nobis auditis et intellectis hinc et inde propositis, demumque die ad audiendum dictum nostrum seu arbitrium predictis partibus assignata, dictisque abbate et conventu per procuratorem ac dicto milite, nomine curatoris predicto, personaliter comparentibus coram nobis et dictum seu arbitrium nostrum sibi reddi cum instantia poscentibus, comunicato bonorum consilio, pro bono pacis dictum seu arbitrium nostrum protulimus in hunc modum : Dicimus et ordinamus per dicturn seu arbitrium nostrum quod dictus miles, nomine curatoris dictorum liberorum, penitus desistat ab impedimento et molestatione predictis, nec de cetero se opponat quominus dicti abbas et conventus habeant et percipiant im perpetuum dimidium modium bladi in prescripto eorum libello petitum, et ipsum ad desistendum per nostrum arbitrium condempnamus ita quod ipsi abbas et conventus ipsi militi, nomine curatorio dictorum liberorum, decem libras turonenses vel minus reddere teneantur, si nobis visum fuerit expedire, ipsos abbatem et conventum ab impeditione dicti militis, nomine curatoris predicto, in causa reconventionis ipsius, per idem arbitrium absolventes. .


1 Pierre d'Aunay avait déjà donné à l'abbaye des Vaux de Cernay un muid de blé sur le moulin de Buisson. V.XIX, p. 24.